Ha ka 1 tarik uni u bnai, sa ar ngut kiwa kyrchaan bha ya ka Congress da ieh noh ki ya ka Party wei da lai psiah ki cha ka Party NPP.
Kini ki ar ngut toh u Dathmulang Ryngkhlem uwa ksoh kam u Vice President ka 1-Nartiang Block Congress Committee wa u Kmen Rymbai uwa man kam u President ka Moopliang Congress Unit.
Katkam ka khubor wa da yoh lum na kini ki ar ngut da ong ki wa da mih ki na ka Congress ym toh wa da yoo sih ki ya ka Congress lane yow yoh myntoi samen tangwa neidaw wa kiwa yahkhmat ka Party ha kani ka Constituency kat dang mih ki sngi da nang yut ki cha kiwi ki Party wei da pynpyrkhat ya ki wa kopsar ym em de i chaniah ya kani ka Party wei da pyntlot ya ki leh kam kiwa yahkhmat yong ka Party wei da dooh leh yei chaniah ya ka Congress Party hapoh ka jylla leh waroh kawi.
Da pynsñiaw ki leh yei kyllooid mynsien u Sniawbhalang Dhar uwa kam u pa ka constituency u wym jooh leh chiliang ya ki khon heiwa da yarap u chiboon bah nadooh ki sarok wa ki luti syngkieñ kiwa man ki budloom ha ka kaam khayi pateiñ khamtam ya ki warep wei awjan waroh ki surok da yoh lut hapoh ka Constituency.
Kamtæ da iwi i sur, ki deilang wa kiwa bood yong ki da rai ki wow kyrchaan noh pura ya u kyrtong ka NPP, u Sniawbhalang Dhar ha ka Election MLA 2023 uwa da pdiang leh ya ki deilang wa ki dkhot cha ka NPP.
