Ka National People’s Party (NPP) ynne ka sngi da pdiang sñiawbha ko ya kiwa yahkhmat na kylleiñ ki District ka Khasi-Jaiñtia.
Kini kynthup ki nadooh ki MLA, MDC warim wa ka MDC wa katni na Umsning, ka Macdalyne Sawkmie Mawlong, najrong u MLA warim ka Ranikor uwa jooh man leh kam u Speaker warim ka Meghalaya, u Martin M Danggo, u MDC ka Langrin uwa man leh u CEM warim ka KHADC, u Manstudy Nongrem, u Hambertus Nongtdu uwa jooh man kam u CEM warim ka JHADC, u Thomas Nongtdu uwa man u MDC warim ha JHADC wa kiwi de kiwa yahkhmat deilang wa kiwa kyrchaan ya ki.
Ha kani ka sngi da pynlai ya ka yalang da u President ka NPP Meghalaya, u Dr. Wanwei Roy Kharlukhi wei da pdiang burom ya waroh kiwa yahkhmat da u President Rangbah ka NPP, u Conrad K Sangma, deiwa emlang u National Vice President, u Prestone Tynsong wa kiwi kiwa yahkhmat ka NPP wa kynthup ya u Sniawbhalang Dhar wa kiwi de ki MLA wa ki wakreh ka Party.
Hawa klam ha kani ka sngi, neiliang u Prestone da pyntikna u wa ka Macdalyne daw yakhun Election MLA ko na Nongpoh, iwa mut pyrchah ya u MLA ka Congress wa katni, u Mayralborne Syiem, katwa ya u Martin M Danggo da pyntikna wow pynyakhun biang na Ranikor pyrchah ya u MLA ka UDP, u Pius Marwein.
