Ynne ka sngi, u Vice President ka 1-Nartiang Block Congress Committee, u Jomiyo Dkhar deilang wa kiwa bood ya oo da ieh noh ki ya ka seiñ Congress deiwa lai psiah cha ka NPP.
Katkam ka khubor wa da yoh na u Jomiyo da ong wa i ieh noh u ya ka Congress toh hajrong ka yurim wa ym de kiwa yahkhmat wa biang ha ka Constituency kamjooh ha ka jylla, da ong u leh wa ka Congress da hiar ko arsut archah hadooh wym em wot uwi leh u MLA ha ka Assembly, wei ini da kdaw che wa hapoh ka Congress da em i yaphær yumut hapyrdi kiwa yahkhmat.
Da ong u leh wa ym em de kiwa yahkhmat nadooh ha ki Grass Root Level hadooh ka State Level wei ym em de i chaniah leh na ki paidbah iwa da ktah chiboon ya ki kyrtong ka Congress ha kani ka Election MLA kawa daw man ha u 2023.
Chooh chooh u Jomiyo da ong u leh wa oo deilang kiwa bood wa ki lok da wan psiah ki cha ka NPP neidaw wa u MLA, u Sniawbhalang Dhar da ye u wow leh rap bha hawa nujor wa kiwi kiwa mihkhmat khamtam ha ri-loom Jaiñtia uwa da wanrah boon ki kaam pynroi lyngba ki chnat sorkar waphær nadooh ka kaam Sports, ki kaam rep kaam riang wa kiwa ri mrad deiwa wan ka KVK wa i wan ka skurbah NEHU kawa da wanrah ya ka chnat puræ hapoh ka thaaiñ wei ym jooh em uwa mihkhmat kani ka thaaiñ wa da wanrah ya chiboon ki kaam pynroi wa kamni.
Ya u Jomiyo da pdiang sñiawbha da u MLA ka thaaiñ, u Sniawbhalang Dhar ha ka yung krehkaam ka NPP na ka 1-Nartiang Constituency.
