Shillong: Uwa yahkhmat ka UDP Circle uwa man leh u Working President, u Mighter Marwein da psiah u cha ka NPP yow kyrchaan ya u kyrtong ka NPP ha kani ka Election MDC chiteiñ samoi na Langrin u Kitboklang Nongrem.
Ya u Mighter deilang wa kiwi da pdiang sñiawbha da kiwa yahkhmat ka NPP ha yungkrehkaam ka Party ha Shillong ynne ka sngi, wei da emlang leh u Kitboklang wa kiwi kiwa yahkhmat.
Hawa klam cha ki laad pathai khubor, u Kitboklang da ong u wa i wan psiah u Mighter daw pynkhlan ko ya ka NPP wow poi cha ka thong ha kani ka Election MDC chiteiñ samoi.
Hawa pynsñiaw yei kmen ya i wan psiah kiwa yahkhmat ka UDP, u Kitboklang da ong u wa ha kam ini i por, man ko i kmen ya ka NPP wei ha i thaw wa da thylli wa mih noh u MLA warim u Martin M Danggo da wan pyndap won da kiwi.
U Kitboklang da ong u wa i mih u Danggo ye ko wow ktah tangwa ym toh hadooh kattæ kattæ neibhah wa mih u khlem kawon kawon ka yasyllok wa ki paidbah kamwa da leh u ha u snem 2018 chwa wow psiah cha ka NPP.
Katwa u Mighter da ong u wa i mih yong oo toh hadien wa ka UDP ym burom ko ya i ya sñiawthooh wow e ya ka Ticket MDC. Da ong u wa hadien wa lait ka kaam MDC, da man ka pali yong oo wow yakhun na ka UDP kamwa da yakut tangwa ini ym em mankaam i kamwa da yakut wei kamtæ da hap u wow mih noh neibhah wym em ka yaburom katkam wa da yakut.
Da pynbaad u leh wa ha ka yalang wa dang dep ka UDP Ranikor, ym em elaad chooh ya kiwa kitkaam wow yaklam tangwa da e laad du ya u President wa u Working President ka UDP. Da kyrmen u wa ki Vote wa da yoh ha ki Election wa da dep, daw man ko i kyrmen ya u kyrtong wa kyrchaan u ha kani ka kynti.
Discussion about this post