U John F Kharshiing uwa man u dkhot warim yong ka Congress, ynnne ka sngi da pynyabi u ya idæ wa ka National People’s Party, wei ya u John Kharshiing da pdiang sñiawbha da u National President uwa man leh u Montri Rangbah ka jylla, u Conrad K Sangma deiwa ya emlang leh u Sniawbhalang Dhar wa u Dasakhiatbha Lamare kiwa man ki Montri sorkar wa kiwa yahkhmat ka NPP, najrong u Pyniaid S Syiem wa kiwi ki wakreh ka Party.
U John uwa man leh u Vice President warim ka MPCC, tangwa da mih noh u na ka Congress ha u snem 2019 wei hadien itæ ym em psiah u cha kawon kawon ka seiñ saiñ pyrthai. Da ong u wa i daw wa psiah u katni cha ka NPP toh wa hadien wa da yoo u ya ki kaam wa kani ka Party kawa yahkhmat katni ya ka sorkar da leh ko wow wanrah yei myntoi ya ki paidbah.
Da ong wa ki daw wa da chim ya ka rai wow em noh wa ka NPP toh wa hadien wa da yoo ya ki kaam wa ka sorkar da leh ko, nadooh i rukom yakhun ya u khñiang COVID-19, da wanrah ya ka rai (Resolution) hajrong ka ILP, kawa da chimkhia wow pynbait ya u pood u ang wa kiwi kiwi, hanla ym man ki kiwa suk wow pynmankaam.
U John da ong u wa toh u e laad ya ka NPP la kammmon kammon 10 snem wow pynyoo ya ki kaam wa da sdang, heiwa da yaroh u leh ya ka sorkar wa da yahkhmat da ka NPP kawa ye wow pynjan ya idæ wa ki paidbah.
Hawa klam ha ka yalang wa tbian yong ka Party, u Conrad Sangma da pynsñiaw u yei kmen wow pdiang sñiawbha ya u Kharshiing.
U President Rangbah ka NPP da ong u wa ka NPP ka yooluti ko wow em chooh chooh kiwa yahkhmat kiwa paaw wa stat ki wow pynyabi wa ka Party, khamtam hadien i long i man iwa da mih ha ka Congress, kawa em ha ka Liang Pyrchah.
U Conrad da kyntu u ya waroh khamtam ya ki dkhot kiwa em ha ka liang pyrchah wow ya krehlang wa ka sorkar, heiwa da ong leh wa kani ka sorkar da chim ko ya ki rai kiwa eh kiwa kiwi ki sorkar ym em ye ki wow leh wei ym nood ki tang wow leh.
