U MLA warim ka Raksamgre, u Limison D Sangma da mih noh u naka Congress deilang wa kiwa kyrchaan yow psiah cha ka National People’s Party (NPP).
Ha ka yalang wa pynman ha Shillong ynnin ka sngi, da pdiang ya u Limison chapoh ka Party da u NPP National President uwa man leh kam u Montri Rangbah ka jylla, u Conrad K Sangma uwa da khana wa u Limison da mih u naka Congress ha ka 7 tarik wei da psiah noh u cha ka NPP deilang wa kiwa boon kiwa kyrchaan ya oo.
“Sñiawkmen i wow pdiang ya u Limison chapoh ka NPP. Sñiawskem O wa ini i psiah u cha ka NPP, ka Party daw khlan chooh chooh ko ym du ha Raksamgre wei hapoh ka ri-loom Garo wa ha waroh kawi ka jylla,” da ong u Conrad.
Hawa klam wa kiwa thoh khubor, u Limison da ong u wa da chim ya ini i rai hadien wa da yoo wym em de kiwa yahkhmat hapoh ka Congress.
Hawa kylli ileh wym psiah u cha ka All India Trinamool Congress (AITC) hawa oo man u uwa yajan bha wa u Dr. Mukul Sangma, da ong u wa u Mukul leh da ieh u ya ka Party wei ini man ko i rai yong oo samen neibhah wa ha oo yoo u wa ka NPP daw yoh biang ko wow chna sorkar.
U Limison toh u payu u MLA ka AITC u Jimmy D Sangma uwa man leh uwi na ki 12 ngut ki MLA ka Congress kiwa da psiah cha ka AITC ini wa dep.
