15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Pteiñ ka Khooid Myntdu wow pynman ya ka pynsñiawthooh paidbah sa ha Loomiongkjam

Advertisement ad1

Ka seiñ Khooid Ya Ka Wah Myntdu ha ka thong wow yoh yei yakrehlang yong ki bru wa chong chnong, ha ka sngi 3 tarik uni u bnai, hei janmiet, kiwa yahkhmat kani ka seiñ da yoohkjat ki sa ha dong Loomiongkjam, Jowai wow pynman ka yalang pynsñiawthooh ya ki paidbah heiyatoh wow yada wei wow thoohlaad thoohluti yow lait ka wah Myntdu u kylla bih.

Ha kani ka janmiet chwa wow yoh i klam i batai na ki bru chemphang yong kani ka seiñ, u Mehi Challam, Waheh Chnong ka Loomiongkjam  da yieñ u wow e ki kyntien pdiang burom neitae pynbood i ngoohblai ngoohsyiem na u Kyrchan Synnah, u Kni ka Loomiongkjam katwa u Khroo Lamsalanki Pariat, President ka Khooid Ya ka Wah Myntdu kam u chongknor da e u ki kyntien yahkhmat heiyatoh weini i thmu ka seiñ deilang i pynyoo ya ki dur wa klam khana yei rukom chah pynsihdur wei pynjakhlia ya ka wah Myntdu.

Ka Rinibet Patlong hei klam i kappæ yong ka, da booh ko u dak kylli hapyrdi ki khon ka dong Loomiongjam deiwa ong, “Yi wa leh tngit, taroi, jakhlia yei man ka wah Myntdu?” Neitae chooh chooh ong ko lada i kam ki pateiñ kani ka juk wache wastat em i i sñiawkhia ya ka pateiñ wa daw kha, kani toh katae ka por kawa dawa ya i wow booh bynda i ya ki da ka umbaam umdih wa khooid wa jngiar.

Neiliang u Snar Lato kam uwi na ki bru stat, bru chemphang wada puræ bniah yei man i long yong ki um ki wah katkam ka juk stat da kdar u wow klam u batai hajrong ki le tylli ki phang kiwa ktah yei man ka wah Myntdu wei chooh chooh da pynsabut u leh yei tngit i jakhlia yong ka wah Myntdu ha ki kattu katni ki thaw kiwa kynthup ya ka Riatsasim, ka Rampyrthai, ka Liar Urkyrdein wa ka Myntwa heiwa katkam ki tiar pynsabut yong ka juk stat sayan da khana u wa ka Riatsasim wa ka Myntwa kajiak dang lait ki nei maa katwa ka Rampyrthai wa ka Liat-Urkyrdein daman ki kiwa em hei maa namo kawa da man Polluted.

U Snar Lato halyndet ki waboon ki rukom tynjooh wa wan ha ka wah Myntdu, khutlang u ya ki paidbah wa chong chnong wow yakrehlang dei wow sdang i na i samen, na ka yung ka sem wow man kiwa tip u pyrkhat yei maa wa yang ya ka wah Myntdu wei wow leh ya ki kaam kiwa man ki laad yada yei mankhooid mankyntang yong ka.

Khaddooh ha kani ka miet chwa wow yoh ki kyntien sñiawngooh na u Secretary ka Khooid Ya Ka Wah Myntdu da em leh i pynlait paidbah ya i sur rwai Chaad Sukra ka dong Loomiongkjam chaphang ka wah Myntdu da u Khroo Lamsalanki Pariat iwa da thoh wei pyntoh pyntne da u Lewan O Langdoh.

Share this:
Previous

Pynkit hi-eh ka sorkar India ha u Conrad wow e kular hajrong ka ILP: Ampareen

Next

Hap pyndooh bordiñ biang hapoh ka jylla