Ka MLA yong ka Congress na East Shillong, ka Dr. Mazel Ampareen Lyngdoh da ong ko wa ka sorkar India ym bna ko yei dawa yong ka jylla wow pynkrehkaam ya ka Inner Line Permit (ILP), tangwa da pynkit won ha u Montri Rangbah ka jylla, u Conrad Kongal Sangma wow e du ki kular.
Da ong ko wa ym pu jooh chem kam kani ka sorkar, lada toh da kawon kawon ka Party wa lai rah hakhmat ka sorkar pyrdi ya ki phang waphær waphær, tangwa ym em wa bna, wei ym yoo wa burom ya ka riti synchaar paidbah wei da mih du kawi ka kular hajrong kawi.
Da ong ko leh wa da yoo wa kiwa yahkhmat ka sorkar India kiwa sah miet da ki phaw sngi wow yalap Election ha Assam, tangwa yow wan ap næ yaklam ya iwa emkaam ka jylla Meghalaya, du 3 kynta leh ym em por ki, wot hadien wa da kular wow wan ha u Wisu (Mar), deiwa kylli leh wa hadooh katwon jngai wow wan na Guwahati cha Shillong.
Kawa yahkhmat ka Congress da ong ko wa ka sorkar India ym em mon ko wow e ya ka ILP ha ka jylla Meghalaya, deiwa pynrap leh wa lada ym ye wow e, ileh kular, ileh ka sorkar ym ong bait ko wa ym ye wow leh, wei ileh wym ye u pynkrehkaam ya ka MRSSA.