Shillong: Ki khynroo kiwa da mynsoo malu mala wei kiwa da yoh u yut nei kti yong ki paidbhur katwa dang wan baamdoh ki na ka chnong Syntung, da kdaw kti bait ki wa u sordar ka chnong Syntung, u Robert Pale toh uwa emkti wow pynchit ya ki paidbhur wow thombor hadooh wa dooh noh syndon ya u lok ki.
Hawa klam ynne ka sngi, u Alfredy Sohtun da pyntip u wa heipor step uni u sordar da chem u ya oo ha sarok wei da kylli u ya oo cheiwon yut u ynnin i miet, hawa jubab wa yut u cha khloo wei bood u leh yei che ki bordiñ. Da pyntip u wa u sordar ka Syntung da thaap u oo wei da em leh kiwa kynjat nadien.
Chooh chooh u Alfredy da pynbaad u wa u Sordar da khut u leh ya ki khynnah chnong kiwa da rah da ki dieñ deiwa mut leh wow kdoh oo ha uwi u chrot, tangwa ha itai i por da wanpoi noh ki pulit hanla kattæ leh dang maham ki oo.
Hawa kylli, u Banteilang Kharumnuid da pyntip u wa hawa yaklam nyngkong em ki ka ya sñiawthooh, tangwa hadien wa wanpoi ki paidbhur da ki kari Sumo deilang wa ki tiar pynmynsoo da pynman ya ki wow yut noh na katai ka thaw.
Hawa kylli chooh chooh, da pyntip u wa ha i por wa chah kær kut wei chah thombor ym yoo u wa em kiwa yada næ yarap ya ki.
Da dawa u wow khang noh wei ym toh de wow tipmit ya katai ka thaaiñ kam ka thaw uiñke suwari neibhah wa ka thaw wanrah ko yei maa ya ki paidbah, wei ha i jooh i por da dawa u wa toh u pynchitom deiwa eh ya kini ki damok wa emkti hei wow chim yei mynsien u lok yong ki.
Kini ki khynroo da pyntip ki leh wa toh ki wa pyntip cha ki pulit deiwa phone chwa ya kiwa ha yung.
Neiliang kini ki khynroo da pynsñiaw ki leh wa ym ye u pdiang ya iwa pynche paidbah yong u sordar chnong ka Syntung hajrong itai i jia.
Lait salit kiwa ha yung ki khynroo na ki paidbhur
Ki manbei kiwa toh kiwa ha yung wa kiwa marjan yong ki khynroo wa chah thombor da pyntip ki wa ha i por wa lai choo noh ya kitai ki khynroo ym em wa yarap yaki hawa kylli ki du yaka luti lai yow poi cha ka thaw wa chah thombor.
Arngut ki manbei kiwa da lai cha katai ka chnong da pyntip ki wa ki paidbhur da pynbaad bait ki wa ki leh toh ki thlen wei da kbai chohnoh ki.
Da pyntip ki leh wa kitai ki paidbhur wa rah wa ki tiar pynmynsoo da kbai ki wow thang yaka kari wa chong ki wei da yoh ki wow yut du hadien wa wan ki pulit.
Discussion about this post