Uwa yahkhmat ka Congress, u Ronnie V. Lyngdoh da beiñ u ya u MLA ka Mylliem u Hamletson Dohling deiwa ong wa da chet kylla u ya ki paidbah ka Constituency deiwa lai psiah cha ka National People’s Party yow yoh kamai spah smat ym wow chakri hok ya ki paidbah ka thaaiñ.
“Lada u Hamlet toh sakhiat uwa yahkhmat ki paidbah ileh ieh u ya ka kyrdan wa heh ha ka seiñ ri-loom yow psiah cha ka NPP? I jubab toh iwa che kdar wa ka NPP kwah ko wow boon khlieh ha Assemly wei u Hamlet kwah tyngka u,” da ong u Ronnie.
“Ka BJP toh kawa da leh thombor ya ki khian paaid ha waroh kawi ka ri India. Da tympra wei pynsih ko ya ki yungmane wei yaleh ki wow pyndooh jait ya ki niam tynre yong ki paaid ri-loom. Wei hanlada tip u yeini, u Hamlet da rai u wow jied ya ka NPP kawa man ka khun mynru ka BJP. Hadooh katni u Hamlet ym pu em ang u wot chi kyntien leh hawa yatoh wa iwon iwon i chah banbeiñ ki paaid ri-loom ha ka jylla næ ha ka ri”, da ong chooh chooh u Ronnie.
U Ronnie uwa da dep rem ha u Hamlet ha u 2018 tangwa da jop won u kam u MDC ka Mylliem ha u 2019 da kylli u, “Katwon chongdor itæ i phoida ki paidbah? 1000, 2000, 5000? Lada katni i dor ha ki san snem yong ka synchaar, da toh wa kheiñ poh ya ki paidbah.”
Kam wow pynkynmoo wa u Hamlet Dohling ha ka tayaw wa dep da psiah u cha ka NPP hadien wa hiar chuki kam u MLA ka PDF na Mylliem Constituency wei u Ronnie V Lyngdoh won toh u kyrtong ka Congress na Mylliem.
Puræ leh: Da ki kyndon wym tih Uranium, u pynyoh ILP wa kiwi de psiah u Hamlet cha ka NPP
