Pynbaad ka liang pyrchah wa pynlut phut ka sorkar hapyrdi i duna poisa

Shillong: U MLA ka Congress na Mawsynram, u Himalaya Shangpliang da rah u yei pynsniaw ha ka dorbar kyrpang hajrong wa ka sorkar ym leh ko iyi iyi wow pynduna ya ka pynlut san wot hawa em ko ha i duna poisa.

Hawa wanrah ya ini i pynsniaw, u Shangpliang da beiñ u ya ka sorkar MDA wa ka da leh lutphut khamtam nadooh wa pynkrehkaam ya ka 5^th Pay Commission wa i khang tih mooyong.

Da ong u wa i lut neibynta wow su ya ka tulop katkam ka 5^th Pay Commission da man ko palat T.1000 klur ha ka chi snem wei da booh kylli u wa lada ka sorkar em ko ya kani ka poisa.

Da pynbaad u wa ka sorkar da pynlut ko ya ka poisa deiwa thied ya ki kari neibynta ki montri wei wow pynchna ya ka yung wa sah ki, nalor wa thung hadooh 65 ngut ki Chairman, ki Co-Chairman, Vice-Chairman nalor ki Political Adviser wa u Chief Adviser.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da ong u wa ini i leh ka sorkar man ko kawa ym em yurim neidaw wa kammon kammon 16 hadooh 18 lak da pynlut man u snem neibynta ki bru wa yajan wa ki seiñ wa em ha ka sorkar.

Da beiñ u deiwa ong wa u CM da mylliñ ya iyi wa da klam u wa ka sorkar yong oo ym pynchlur ko wow pynman ya ki tamasa, katwa tangwa neibynta u syntu dieñ, kani ka sorkar da pynman ko ya ka Cherry Blossom Festival kawa heh ha ini wa da dep kawa ym em wanrah nong iyi iyi leh ya ka jylla kawa pynlut donhi ya ka poisa paidbah ha ki tamasa.

Ha iwi tawon i liang da ong u wa ka NH7 kawa pynman man u snem, da e yaroh u wa pynku ko ya ka rwai ka tem ha ka jylla, tangwa ka sorkar toh u pynmih poisa ko na kam kini ki tamasa.

U MLA ka Congress da beiñ u leh yei lai Delhi khak khak u CM wa ki montri deiwa kylli hadooh katwon ka jylla yoh myntoi ko næ ki yi ki scheme wa da wanrah, kamtæ da ong u wa ini toh i pynlut phut ka sorkar.

Da ong u leh wa da yoh yutip u na ki Bank kiwa em ha sor Shillong wa ki da ood ki ya kani ka sorkar neibhah ha kini ki 6 bnai ka sorkar ym jooh thap poisa de ko wei pteiñ ko du wow sai donhi.

Chooh chooh u Shangpliang da beiñ wa i wan ki montri ka sorkar pyrdi deiwa ong wa man ko ka pynlut phut ya ka poisa ka jylla, tangwa ym em kawon kawon wa leh ki neibynta wow pynku ki ya ka ka jylla wow pynkylla ya ini i wan ki cha ka Visit East Policy.