I pynyoo nia wei kdaw kti hapyrdi kiwa yahkhmat seiñ saiñpyrthai ym pu em kut i kawa yatoh waka Election MDC cha ki ar tylli ki Autonomous District Council, wot hadien wa ka Election KHADC wa JHADC da kut noh ko ha ka 24 tarik u Thohlakhmi.
Ini i ya pynyoo nia da mih biang ko ynne ka sngi wa ar yong ka Dorbar Mang Tangka ha ka yatai hajrong i klam u Lat ka jylla namo ka Governor’s Address.
Hawa klam hapoh ka dorbar ynne, u President ka Voice of the People Party (VPP) uwa man u MLA ka Nongkrem, u Ardent M Basaïawmoit da pynsñiaw u yei wym yahaap hajrong i klam u Lat ya ka Election MDC 2025 wa da ye u pynlai bait deiwa kreh chitom ki bor pynlai District wa ki pulit.
Da ong u wa ka Election wa khooid wei kawa laitlooid toh du ha ka KHADC, ym ha JHADC. Da kam u wa lada em ka Election wa khooid ha JHADC, ka VPP da yoh ko wow knieh yei kaam synchaar ha ka Executive Committee ha JHADC.
Da pynbaad u leh wa ha ka Election ha JHADC, ki Vote kiwa boon lai ki cha ki kyrtong wa kyrchaan da ki bor chnong, wei da em leh i maham ya kiwa kyrchaan ka VPP ha Jaiñtia Hills.
Hawa e yei jubab yeini wa pynbaad u Ardent, neiliang u MLA ka Jowai, u Wailadmiki Shylla da ong u wa sñiawsih wow sñiaw yei pynbaad yong u MLA ka VPP, neibhah wa ha ka thaiñ wa jop ki toh wa man ka Election wa laitlooid wei kawa khooid tangwa ha ki thaaiñ wa rem ki ka Election won ym em man ko kawa khooid.
Discussion about this post