Shillong: Uwa yahkhmat ka Congress ha ka jylla, u Dr. Mukul Sangma da dawa u wa da toh wow khut noh ya ka yalang yong ka State Security Commission wei ka sorkar toh u jubab ko hajrong i kyrriah kaam ya ki pulit, khamtam ya u pulit uwa takit ya ki kaam chukor ha SS Netcom.
Da pynbaad wa ya ki sabut hajrong ini i kaam pyrchah yaka aiñ da pynwiar yabor da u James Sangma wa u Conrad K Sangma kiwa toh ki tre ka SS Netcom wei da pynbor leh ya ki pulit wow ekti noh ya ka Charge Sheet khlem da pyndep ya ka takit wa pura.
Da ong wa ha u Naisaphra, 2017 da ujor pyrchah ya ka Company kawa da pynlai ya ka Call Centre thok ha i thaw wa em ka SS Netcom, deiwa pynbaad leh wa ka SS Netcom da thung kaam ko ya kiwa boon ki khynroo ka jylla wa ka thaaiñ Northeast, wei ya kini da e sikai da phah pynpliah phah ha kawi ka Company thok kawa em ha Ahmedabad kawa da tip kam ka IFA, kawa toh i pyrtuid siñ (Irfan Faisal & Ahmed), wei i maa na ini toh wa da yoh sikai ki wow leh yaki kaam wa man pyrchah yaka aiñ kam hei wow thok wow chukor poisa ya ki bru kiwa na baar ri.
Da pyntip u leh wa da yoh yaka chithi wa da thoh da u SP ka East Khasi Hills ha u Thohlakhmi (Feb), 2019 kawa da pynsñiaw wa ki pulit tieñ ki wow takit ya ki kaam pyrchah yaka aiñ yong ki bru wa embor hadien wa da chah kyrriah kaam noh u Inspector MM Khan wa uwi u pulit wa takit hajrong katai ka kaam pyrchah yaka aiñ.
