Uwa yahkhmat ka Congress hapoh ka jylla, u Ronnie V Lyngdoh da khyrwit u yaka Trinamool Congress, deiwa ong wa ka TMC waka Bharatiya Janata Party (BJP) toh kiwa em i ya pynbait sop-sop ki yow ya krehlang hapoh jylla West Bengal.
Yeini da ong u Ronnie hadien i pynbaad uwa yahkhmat ka TMC Meghalaya, u Dr. Mukul Sangma wa ka Congress da pynbna ko ya ki kyrtong Election cha Lok Sabha na Shillong wa Tura khlem da yasyllok lang waka TMC kawa emlang hapoh ka INDIA Bloc.
U Ronnie da ong u wa ka TMC kawa em hapoh ka INDIA Bloc ym bien ko wow ya pynbait lang ya ki 42 tylli ki Constituency wow yakhun ha West Bengal, tangwa da thooh daw ko yaka Meghalaya kawa em du ar tylli ki Constituency Lok Sabha.
Uni uwa yahkhmat ka Congress da ong wa ki paidbah daw bichaar ki neibhah kamwa da jia ha kiwi ki jylla, kiwa yahkhmat wa pyrchah yaka BJP da phah kdong da ka CBI, ED waka IT, katwa ha West Bengal ym em leh kamtæ.
Kam wow kdaw heini ka TMC da pynbna kyrtong ko naphang ha waroh ki 42 tylli ki MP Constituency wa em ha West Bengal khlem da pynlait kawi leh yow yakhun du ka Congress katwa ka Congress won ha Meghalaya da pynbna kyrtong ko ha waroh ar tylli ki Constituency wa kynthup yaka Tura wa Shillong katwa ka TMC da pynbna ko du ha Tura kamwa da ya pynbait chwa ki.
Discussion about this post