U President ka Meghalaya Pradesh Congress Committee (MPCC), u Vincent Pala da pynbaad u wa ka huri hura kawa da mih hapyrdi kiwa kyrchaan Congress wa NPP ha ka chnong Garodubi kawa haap hapoh ka Rajabala Constituency toh neidaw wa sdang kiwa kyrchaan ka NPP kiwa da kawang moo ya ki bru ka Congress kiwa dang wan naka yalang Election.
Da pynbaad u wa ka sorkar ka da phah kem ko du ya ki wakreh ka seiñ Congress, katwa ya ki wakreh ka NPP kiwa da sdang wow pynmih ya ka huri hura ym em kem ya ki. U heh ka MPCC da ong u leh wa hajrong itai i jia neiliang ka Congress da ujor FIR ko wei da yoh yutip leh wa ki wakreh ka NPP leh ki da ujor FIR ki markylliang.
U Pala da ong u wa daw yaklam leh ya ini i kaam wa u Chief Electoral Officer (CEO), u FR Kharkongor yow kyntu wa lada leh iyi iyi, toh u leh ya waroh arliang ym toh wow leh du ya kawi ka kynhun. Da ong chooh chooh wa ini i leh ye wow man neidaw wa ka NPP tip ki waka Congress ka khlan bha ko ha kani ka Election chiteiñ samoi, wei ki bru yong ka NPP ki pyrchang ki wow pyntieñ ya ki paidbah yow khanglaad i kyrchaan ya ka Congress.
Kam wow kdaw heini wa ynnin ka sngi kawa man leh ka sngi kut ki yalang yalap Election chiteiñ samoi, da em i ya kynaad hapyrdi kiwa kyrchaan ka Congress waka NPP ha ka chnong Garodubi kawa haap hapoh ka Rajabala Constituency, heiwa da pynbaad wa kiwa kyrchaan ka Congress wa da lai ki wow thombor ya i yung yong uwi uwa yahkhmat NPP, wei ha ini i jia ki bru na waroh ar liang da mynsoo wei da ya pynbaad markylliang.