Ka seiñ HITO da ujor ko cha ka Chief Secretary (CS) ka jylla hajrong i rukom pynman yalap Election ha Mawryngkneng, Mawphlang wa ha Rajabala Constituency neidaw wa da tyngkheiñ ki ya ki kyndon yada COVID-19.
Ka seiñ da ong ko wa nadooh u Naitung (April) 2020 ka jylla Meghalaya da chah ktah ko ha ka khlam COVID-19 heiwa da em boon kiwa da dooh yei mynsien heiwa da hap leh wow pynkrehkaam ya ka Lockdown iwa neiliang ki paidbah da bood ki ya ki kyndon wa booh da ka sorkar hadooh ha ki por lehkmen wa ki yalang paidbah yow lait u poor ka khlam.
Hajrong ini, ka seiñ da ong ko wa manda pynman Election ha kini ki 3 tylli ki Constituency ym em wa bood heiwa da tyngkheiñ lut ya ki kyndon yada naka khlam nadooh i deiñ Mask, i pynyajngai (Social Distancing) wei neiliang ki bor wa toh u pait yeini da leh thlah ki yei wym bood ya kini ki kyndon heipor wa em kini ki Election.
Ka seiñ da ong ko leh hawa pynman ya ki yalang paidbah da chah du 50 ngut ki bru katwa ha kani ka Election chiteiñ samoi ym em booh pood de heiwa da ki spah ngut ki bru da yalang ki khlem da deiñ Mask heiwa ym em leh pait wa lada ki paidbah toh kiwa da dep yoh tika lane ki wym pu em yoh tika.
Kamtæ da kylli wa lada ki kyndon yada COVID-19 toh kiwa du neibynta ki bru paidbah wei ym em krehkaam ki heipor Election. Hajrong ini waroh da kyrpaad wow chimkhia yeini i tyngkheiñ kyndon wei wow pyntip leh wa lada kiwa thap Vote toh kiwa da dep yoh tika næ wym pu em wei lada daw Test ya ki chwa wow thap Vote yow pyntikna wa bood yei kyndon yada COVID-19.