U MLA ka Rangsakona uwa man leh uwa ektien ka Congress, u Zenith Sangma da kylli u hajrong ki kaam pyrchah aiñ wa ka Garo Hills Autonomous District Council (GHADC) da ebor ko wow booh Check Gate ya u heh ka NPP ha North Garo Hills u Sanjay A Sangma uwa man uwa hayung yong u montri rangbah ka jylla uwa da khrong dan tooh u na ki truck kit mooyong.
Da ong u wa ini i khrong poisa lyngba kani ka Check Gate toh kawi na ki kaam pyrchah aiñ kiwa hayung u Conrad Sangma neibhah wa da khrong poisa da i yarap ki pulit, deiwa pynrap leh wa ka GHADC dang yoh ko ya ka bhah na ka sorkar jylla heiyatoh wa i chalan ya ki mar poh-khyndaw khamtam na u mooyong wa da lilam katkam ki kyndon, kamtæ kammon da yoh bor wow khrong poisa lyngba kani ka Check Gate.
U Zenith da ong u leh wa ka GHADC da e bor ko wow booh ya kani ka Check Gate nadooh 16 Naichiphaw uni u snem, 2 sngi chwa wow chimkti u Lat ya i synchaar Administrator ha GHADC.
Da ong u leh wa ini i khrong poisa man i T. 500 kawi ka truck kit mooyong wei ynnin da sdang chim won T. 1000 kawi ka truck.
Chooh chooh da ong u wa hajrong ini i leh pyrchah aiñ da ki bru wa em hei bor, neiliang ki kattu katni ngut kiwa chong chnong da ujor ki ha u Deputy Commissioner ka North Garo Hills uwa da phah won yeini cha ka yung krehkaam u Superintendent of Police ka District.
