Ka Montri ka chnat i chait i khiah, ka Dr. Ampareen Lyngdoh, ynne da yachem ko wa kiwa yahkhmat ka KSU heiyatoh wa i wym hun wei iwa da ujor ka seiñ pyrchah ya ki bru wym yoo tikna toh kiwa chong chnong wa pura ka Meghalaya kiwa da yoh ya ka State Quota ka Meghalaya wow lai puræ MBBS.
Ka seiñ da e lang ko wa ki kot ki sla kam ki sabut yow pynsakhiat ya ini wa da suba khamtam ya kitu kiwa da mih pyrtuid hapoh ka Open Category wa kiwa mih pyrtuid hapoh kani ka Waiting List neibhah kini da pynbiang ki da ki Birth Certificate ki wym biang wei ym em ki leh ya ka Permanent Residential Certificate (PRC) kawa toh u em katkam ki kyndon wa da pynmih da ka sorkar.
Ka seiñ da ong ko wa u Mehbub Hassan ym em e PRC u tangwa da e donhi da ka Provisional PRC (PPRC) kawa da yoh u ha ka 07-06-23 na Dadenggre wei kawa krehkaam du 12 bnai donhi. Ya uni da kha ha u snem 2001 tangwa ka Birth Certificate won da e ha ka 2019 ka wym em leh ya ka Serial Number wa biang waka Court Order yow pynsakhiat yeini.
U Monimul Ekram Mondal ym em e u ya ka Birth Certificate wei da em u ya ka PPRC kawa krehkaam du 3 bnai donhi wei ym em u ya ka PRC.
U Ayush Kumar da e donhi u du ka Birth Certificate wa da yoh u na Bihar khlem da em ka Court Order, da e u leh ya ka kot wa da yoh na ka CBSE Rajasthan katwa ka PRC won na East Jaiñtia Hills.
U Md Mahmadul Islam da e u ya ka Birth Certificate kawa da yoh u ha u snem 2012, wei da Register ha u snem 2002 tangwa da kha ya oo ha u snem 2003. Uni ym em u ya ka PRC tangwa du ka PPRC wa yoh u na West Garo Hills kawa krehkaam du 12 bnai donhi wei da e u da kani cha ka sorkar.
U Atifa Zaman ym em u e Birth Certificate u, ym em e PRC wei da em u du ka PPRC kawa yoh u na West Garo Hills kawa krehkaam du 12 bnai donhi.
U Chiranjit Kumar Paul da em u ya ka Birth Certificate kawa yoh u ha u snem 2008 tangwa da kha ya oo ha u snem 2005 wei da yoh u ya kani ka Certificate khlem da emlang waka Court Order. Ym em u leh ya ka PRC wei da e u du ka PPRC kawa krehkaam 12 bnai donhi.
Ka Deeya Choudhary da e ko ya ka PRC tangwa ym em Birth Certificate wei ya kani hap wow pyntikna heiwon kha ya ka.
U Angoor Zaman Hoque da e u ya ka Birth Certificate khlem da emlang ka Court Order wa i Serial Number. Ym em u leh ya ka PRC wei da em u du ka PPRC na West Garo Hills kawa krehkaam du 12 bnai donhi.
U Abdul Kalam Golam Mahdi Alom da yoh u ya ka Birth Certificate kawa da pynmih ha u snem 2014, 12 snem hadien wa kha ya oo wei khlem ka Court Order wa i Serial Number. Ym em PRC u leh wei da yoh u ya ka PPRC kawa da e ha ka 16-05-23 kawa krehkaam du 3 bnai donhi. Wei uni toh uwa da yaleh ya ka NEET na Assam tangwa da wan u wow yaleh ya ka Quota ka Meghalaya.
U Habibur Rehman uwa mih pyrtuid hapoh ka Waiting List ka Open Category ym em u ya ka PRC tangwa da wanrah u du ka PPRC wa krehkaam 12 bnai wei ym tip leh heiwon kha ya oo.
Hajrong ini, ka seiñ da ong ko wa kini ki 10 ngut ym em ye ki wow pynkhun ya ki kyndon wa da booh da ka sorkar wei toh u pyndam noh yei pyrtuid ki wei wow pynman ya ka takit kammon da yoh ki ya ki kot ki sla ki wei wow thap noh da ki bru wa toh hok wow yoh u lai puræ MBBS na Meghalaya.
Neiliang ka Montri da kular ko ya ka seiñ wym kheiñstiñ ko ya ini i kaam wei ka sorkar daw pyntikna ya waroh kini ki kot ki sla wei lada chem wa em i wym biang daw pyndam yei pyrtuid kini kam kiwa yoh u lai puræ MBBS.
Puræ leh: Da ki wym ye u pynsakhiat wa man kam ki tre jylla yoh ki wow lai puræ MBBS na Meghalaya: KSU
Discussion about this post