Ka Khasi Hills Autonomous District Council (KHADC) sa chisien da rai ko wow khang biang ya i pynemkaam Plastic ha ki yaw wa ki thaw paidbah nadooh ka 19 tarik uni u bnai, wei ya ini da pyntip da u CEM ka KHADC u Titos Chyne.
Hawa yaklam wa wa ki laad pathai khubor ynne ka sngi, u Titos da ong u wa ka Executive Committee (EC) ka warim da pynmih ko ya kani ka hukum ka wow krehkaam hapoh u pood u ang yong ka Council khamtam ha ki yaw ki haat deiwa sdang na ka yaw wa heh dooh ha ka jylla katæ ka Ïewduh.
“Neiliang ka EC kawa katni leh, hadien wa da chong boon ki yalang da chim biang ya ka rai wow khang noh yei pynemkaam Plastic ha ki yaw deiwa sdang na Ïewduh”, da ong u.
Da ong u leh wa ka Council da pynmih biang ko ya ka hukum khamtam neibynta kiwa dai dukan khamtam ha Ïewduh wa ym toh de wow pynemkaam ya ki muna Plastic wei da ong u wa neiliang ka EC da rai wow phah ya ki wakreh yong ka deilang wa ki pulit u Syiem yow pait ya ki yaw ki haat wa ym toh de wow pynemkaam ya ki Plastic deiwa sdang na Ïewduh wei daw poor won sa cha kiwi ki yaw kiwa haap hapoh u pood u ang ka Council.
“I kyrpaad i ya ki khlieh synchaar nadooh ki Syiem, ki Sordar, ki Waheh Chnong wow e ki yei ya krehlang wa ka EC hajrong ini i bynta”, da pynrap u.
“Neiliang ka EC da rai wa lada chem ya ki dukan dai Plastic wot lada toh yong kiwi won ki jaitbru hanla em ki ya ka Trading License, lada ka EC chem ko, ye wow pyndooh noh ya i hok khayi yong ki ha ki yaw ki haat hapoh u pood u ang ka District Council,” da ong chooh chooh.
U Titos da pyntip u leh wa ya i pynbna paidbah da pynmih ynne ka sngi ka 19 tarik wei u krehkaam biang ko chi syndon.
Hawa pynrap ya ini i rai, neiliang ka Grace Mary Kharpuri, EM market da ong ko wa ini i leh ka Council toh wow wai laad biang ya kiwa chna munakot wei kamjooh ya kiwa soor muna wow khai-im biang ha ki kaam yong ki wei ini daw wai laad leh ya kiwi wow yoh kaam yoh jaam.
Da pyntip leh wa neiliang ka yung dorbar yong ka KHADC, ha ki sien chong dorbar wa da dep, da mynjur ya ka aiñ Solid Waste Management wa da phah cha u Lat tangwa wa em i duna wa khian wa nai heini heitai da pynman wym pu hoi u pynman aiñ.
“Tangwa katni da dep pynbait lut yow lai rah biang ya kani ka phang ha ka sien chong dorbar wa katni khnang wow yoh pynman aiñ noh,” pynrap u Titos.
Da ong u wa aiñ daw yarap ko hei krehkaam ka Council hawa yatoh wa i khooid i suba yong ki thaw kiwa haap hapoh u pood u ang yong ka Council.
Da pyntip u leh wa ka Supreme Court da phah ko ya ki sorkar jylla wa ki District Council wa toh u pait bniah hajrong i khooid i suba.
Puræ leh: Khang ka KHADC wow pynemkaam Plastic hapoh u pood u ang yong ka
