Ka Dorbar Chnong Mukroh Pyllun hapoh i yahkhmat u Waheh Chnong, u Kitlang Maskut, u Secretary Chnong, u Precioustar Sten, u Chairman Chnong, u Chilangki Phawa wa u Adviser, u Kalbinus Dkhar ynne ka sngi da lai pyntip ki cha u DC ka West Jaiñtia Hills District wow Boycott ya ka Election MDC myntu u snem neibhah wa ka chnong yong ki pteiñ ko wow maad yei chah thombor neipor cheipor haka sorkar Assam.
Ya kani ka rai khana ki wa da chim ki haka dorbar wa da pynman ha ka 9 tarik uni u bnai January neidaw wa i chah thombor ha ka KAAC kynthup nadooh i wanrah yei chna pyrchah aiñ ya ka Assam Forest Beat House, i chna sarok yabor na Khlieh Sanaro Mukroh cha Umlaphiah Mukroh wa kiwi de wa da jia nadooh ki snem nachwa.
Da pynkynmoo ki leh yei jia heiyatoh i dooh ya 5 ngut tylli ki mynsien bru ha ki kuli ka Assam haka 22-11-22 wa hadooh katni leh wym pu em yoh ki yei bichaar wa hok, wei ki paidbah leh im ki hei syier mynsien wot hei thaw yong ki hi leh.
Hanla neipor cheipor ka chnong da pynsñiaw ko yei eh i khoo deiwa paan ki bor yada tangwa wym poi i cheiwon cheiwon.
Kamtæ kani ka Boycott ong ki man ko kam ka dak wow pynyoo cha ka sorkar wa cha ka pyrthai yei eh i saja ka chnong yong ki.
Wei hajrong ini i rai yong ki, lada ka sorkar emkaam ko yei yaklam neibynta wow pyndam yei Boycott hap ko wow lai yaklam wa ki paidbah ka chnong haka dorbar pyllun.
Discussion about this post