Ka Congress kawa da dooh noh ya ki ar ngut ki MLA ha uni u snem, kitæ na Mawryngkneng wa Rajabala daw hap pynkhreh biang ko wow yoh biang ya kini ki Constituency ha ka Election chiteiñ samoi ka wow man ha uni u bnai wow wan.
Hawa yaklam wa ka Working President ka Meghalaya Pradesh Congress Committee (MPCC), ka Dr. Mazel Ampareen Lyngdoh da ong ko wa ka Party daw pynyieñ kyrtong ko ha waroh ki le tylli ki Constituency wa kynthup ya ka Mawphlang wei ka congress da pynsñiaw ko wa ka Party kyrmen ko wow leh bha ha kini ki Constituency.
Heiyatoh wa u kyrtong na Mawryngkneng ka Party da rai ko wow pynyakhun da u Highlander Kharmalki, na Rajabala da ka kurim u Dr. Azad Zaman uwa man u MLA warim ka Congress uwa da khlaad noh, wei neibynta ka Mawphlang da ong ko wa ka Party daw pynyakhun biang ko da u MLA warim uwa da rem ha u snem 2018, u Kennedy Khyriem.
Ka Election Commission of India ynne ka sngi da pynbna ko ya ka tarik wow pynman ya ka Election chiteiñ samoi ha kini ki Constituency wei i pynkhreh da man i iwa da sdang chongchit khamtam na ka NPP kawa yahkhmat ya ka sorkar ha ka jylla katwa ka Congress won da em ko ha ka liang pyrchah.
