Ynne ka sngi u Vincent H. Pala, President ka Meghalaya Pradesh Congress Committee da pdiang burom u ya u Emlang Laloo cha ka Party Congress kum u kyrtong yong ka seiñ wow yakhun yaka Election MLA 2023 naka 1-Nartiang Constituency najrong wa kiwi won ki dkhot yong ka Nartiang Congress Block Committee, ha Mission Community Hall Namdong.
U Emlang Laloo toh uwa naka chnong Saitsama wei man u leh u sahep sorkar hapoh ka chnat Soil & Water Conservation ka sorkar jylla, kamtæ neidaw wa em i thrang i angnood wow yakhun yaka Election MLA 2023, da chong ngiah noh u deiwa chim daka Voluntary Retirement Scheme.
Hawa e yei klam da ong u wa ym em kwah u yaka burom neibhah ka burom da em chwa ha ki kaam wa kreh u kam u chakri sorkar neibhah chwa wow hiar u cha madan saiñ hima-sima da ksoh u yaka kyrdan Joint Director yong ka chnat Soil & Water Conservation.
Tangwa iwa kongsan hi wa kwah u wow chimbynta ha kani ka Election toh wa da yoo wei sñiaw u wa wa ki paaid warep ka Constituency da chah iehbeiñ chawa palat wei ym em leh ka roi ka paar.
Da ong u leh wa kamwa jooh embynta u waki warep, na ini i daw kwah u wow chim ka bynta wa rap haneiñ wow yarap ya ki warep neibhah wa hapoh ka thaaiñ Nartiang ki warep em ki kamwa 90%.
Chooh chooh kam uwa da heh da san haka chnong Saitsama da ong u wa da yoo u leh yei eh haki thaaiñ khappood najrong wa sñiawthooh u leh rap bha.
Hawa kyruiñ won chei jied u yaka Party Congress, da ong neidaw wa chem u waka Party toh kawa sakhiat kawa pait ya kiwa dooh wa duk khlem i chah chiliang la haka niam ka rukom, ka longbru manbru deiwa shynchaar salonsar, najrong wa kdaw leh yaki kaam wa ka Congress da leh ko haki por nachwa.
U MDC ka Mawhati u Charles Marngar uwa da emlang ha kane ka sngi, da klam u yei eh yong kiwa sah ha khappood, khamtam i eh wa ki bru maad ki haka Constituency yong oo neipor chei por heiwa da hap mih madan u da idæ wow yakhun wa ki pulit Assam, najrong wa pynkynmoo u yeiwa jia dang ini wadep.
