Ka Election Commission of India (ECI) ynne ka sngi da pynbna ko ya ki tarik pynman Election ha ki le tylli ki jylla kitæ ha Meghalaya, Tipura wa Nagaland.
Ha Tripura ka sngi thap Vote toh ha ka 16-02-23 katwa ha Meghalaya wa Nagaland won u pynman ha ka 27-02-23 wei ka sngi ñiaw Vote ha waroh ki 3 tylli ki jylla u man ko ha ka 02-03-23 wei toh u pyndep waroh ki kaam Election ha ka 04-03-23.
Ka tarik wa khaddooh wow thap pyrtuid ki kyrtong ha Meghalaya wa Nagaland toh ha ka 07-02-23 katwa ha Tripura won ha ka 31-01-23.
Ka tarik wow sylli ya ki kot ki sla u man ko ha ka 31-01-23 ha Tripura katwa ha Nagaland wa Meghalaya u man ko ha ka 08-02-23.
Ka tarik wa khaddooh wow kynran dien ki kyrtong ha Tripura u man ko ha ka 02-02-23 katwa ha Meghalaya wa Nagaland u man ko ha ka 10-02-23.
U Chief Election Commissioner, u Rajiv Kumar da pyntip u waka Model Code of Conduct u sdang noh ko u krehkaam nadooh myntu ha waroh kini ki 3 tylli.
Ka samoi man MLA ha Meghalaya toh kawa daw kut ha ka 15-03-23, ha Nagaland ha ka 12-03-23 katwa ha Tripura won u kut ha ka 22-03-23.
Ha Meghalaya da em 12 tylli ki District heiwa na ki 60 tylli ki Constituency da em 55 tylli ki ST Constituency wa 5 tylli ki General Constituency wei kiwa thap Vote da em ki 21,61,129 ngut.
Ha Nagaland da em ki 16 tylli ki District wei na ki 60 tylli ki Constituency da em 59 tylli ki ST Constituency wa kawi ka General Constituency wei waroh kiwa thap Vote da em ki 13,09,651 ngut.
Ha Tripura da em 8 tylli ki District wei na ki 60 tylli ki Constituency da em 30 tylli ki General Constituency, 10 tylli ki SC Constituency wa 20 tylli ki ST Constituency wei waroh kiwa thap Vote da em ki 28,13,478 ngut.
