Ka National People’s Party (NPP) da lehkmen ko ya ka sngikha wa 74 snem uwa seiñ ya ka Party u (L) P.A. Sangma, ha ka yalang wa em ha ka yung krehkaam ka Party ha Shillong ynne ka sngi. Ya ka yalang da sdang deiwa ki dkhot ka Party da kynmoo warom ki ya u P.A. Sangma wei da pynbood da ka ngooh Blai.
Ha kani ka yalang da em u State President, u Dr. WR Kharlukhi, National General Secretary, u James Sangma, National General Secretary ka Women’s Wing, ka Dr. (Mrs.) Mehtab A. Sangma, Working President ka Women’s Wing, ka P. Nongpluh, National Youth Working President, u Nickey Nongkhlaw, President ka Shillong City, u Anthony Nongbri, State Working President, u D. War wa kiwi kiwi de.
Hawa kynmoo tympang ya u P.A. Sangma, u State President ka NPP, u WR Kharlukhi da kynmoo u ya i por wa psiah u cha ka Party, deiwa ong, “U P.A. Sangma ym man u du uwa yahkhmat ha ki kaam seiñ hima, tangwa uwa ye u chynna jngai. Toh oo uwa da booh yurim hajrong wa da krehkaam ka Party katni. Toh oo leh uwa da kular wow yarap u kreh neibynta ki bru ka thaaiñ Northeast waroh kawi.”
Ka Dr. Mehtab A. Sangma leh da pynsñiaw ko yei burom wa i sñiawngooh ya uwa yahkhmat ya waroh iwa da dep leh u neibynta ka thaaiñ wa ka jylla. Da klam ko leh yei angnood yong oo wow rah ya ka NPP cha ki kyrdan wa chaneiñ deiwa ong, “I emkaam i wow kreh yow poi cha ka thong deiwa booh kyrpang ya ki jaitbru ri-loom. I emkaam i wow pynman ya ka Meghalaya kawa khlan dooh ka thaaiñ kawa tyrchaaiñ dooh kawa e mynsien ya waroh kawi ka thaaiñ Northeast”.
Neiliang u James Sangma da kdaw u ya ki thong wa ki moomær wa da poi ka Party nadooh was dang ya ka. Deiwa ong leh wa ka NPP da man ko ka Party wa nyngkong dooh na Northeast kawa da tipmit kam ka National Party kawa da yoh leh yei yung krehkaam ha ka nongbah ka ri ha New Delhi.
Da pynbna u leh ya ka 1 tarik u Naikhynde wow man kam ka sngi wa sdang namo ka Foundation Day ka NPP yow man leh kam wow sahkynmoo ya ka sngikha uwa sdang ya ka, “Kamwa tip i wa em boon bha i wym che heiyatoh wa ka sngi wa sdang ya ka Party. Kamtæ da rai da u National President, u Conrad Sangma wa deilang wa ka sngikha u Purno Sangma kam uwa sdang ya ka Party kamjooh uwa jooh yahkhmat ya ka jylla, ya 1 tarik u Naikhynde daw lehkmen kam ka Foundation Day ka NPP. Ynne kwah O wow e khublei ya uwi pa uwi na kiwa yahkhmat ka Party wa ki dkhot da ka Foundation Day wa kmen ka NPP”.
Ki dkhot ka Party da chim ki leh ya ka kular wow kreh neibynta i bha i miat ka Party, ki paidbah wa ka jylla.
