Ka People’s Democratic Front (PDF) ynne ka sngi da pynbna ko ya ki kyrtong na ki 8 tylli ki Constituency ki wow e reiñ ha ka Election MLA 2023 hapoh ka jylla.
Ya kini ki pyrtuid yong ki kyrtong da pynbna da u President ka Party, u Gavin M Mylliem, wei kini ki kyrtong kynthup ki ya u Shembok Garod na Raliang, u Rowel Shadap na Mawhati, u Donlang Sohkhlet na Umsning, u Romeo Phira Rani na East Shillong, u Egenstar Kurkalang na Nongkrem, u Auspicious L Mawphlang na Mawphlang, u Gavin Miguel Mylliem na Sohra wa u Banteidor Lyngdoh na Mawkynrew.
Neiliang u Gavin da khana u wa ka Party hadien wa da ap ya ki Zonal Committee ha kylleiñ ki Constituency, da yooluti wow pynyieñ kamwa 10 hadooh 15 ngut ki kyrtong, wei yei pyrtuid yong kiwi won daw pynbna ha ka bynta kawa ar ha ki sngi wow wan.
Hawa yatoh wa ki 2 tylli ki Constituency, kitæ na Umsning wa Mylliem kiwa ka Party da jop ko ha u snem 2018, tangwa ki MLA ka PDF da pynkhreh ki wow yut seiñ, u President ka PDF da ong u wa ha Umsning da pynmih chakhmat da uwi u kyrtong, tangwa neibynta ka Mylliem ka Zonal Committee ym pu em ye wow rai ya u kyrtong.
Ha iwi i liang, u Gavin da khana u wa ka Party ha kini ki tayaw wow wan daw pynlait paidbah noh leh ya ki kular Election namo ka Election Manifesto hadien wa ka Manifesto Committee da dep ko wow pynbait pynbiang.
