Ka sorkar Meghalaya ynne lyngba ka chnat Home (Political) Department da pynbna ko ya ki le tylli ki Regional Committee neibynta ka Ri-Bhoi, West Khasi Hills wa West Jaiñtia Hills.
Ini toh neibynta ki kaam pynbait pood ha kani ka wat wa ar ki thaw wa em i ya kajia pood ha Langpih, West Khasi Hills District, ha Borduar, Nongwah-Mawtamur, Deshdoomreah, Block-II kiwa haap hapoh Ri-Bhoi District wa ka Block-I, Psiar-Khanduli kiwa em hapoh ka West Jaiñtia Hills District.
Ya ka Regional Committee ka Ri-Bhoi u khlieh da u Prestone Tynsong, Deputy Chief Minister i/c Public Works (Roads) kam u Chairperson, u Dasakhiatbha Lamare, Minister, i/c Transport kam u Member, u Mayralborn Syiem, MLA, Nongpoh Constituency kam u Member, u Jambor War, Executive Member, KHADC (Elaka) kam u Member, u Rangkynsai Kharbuki, MDC, Umroi, KHADC kam u Member wa u Deputy Commissioner, Ri-Bhoi District kam u Member Convenor.
Ya ka Regional Committee ka West Khasi Hills u khlieh da u Renikton L. Tongkhar, Minister i/c PHE kam u Chairperson, u Macmillan Byrsat, MLA, Nongstoin Constituency kam u Member, u Kimfa S. Marbaniang, MLA, Rambrai-Jyngam Constituency kam u Member, u Gigur Myrthong, Deputy CEM, KHADC kam u Member, u Bajop Pyngrope, MDC, Rambrai-Jyrngam, KHADC kam u Member wa u Deputy Commissioner, West Khasi Hills District kam u Member Convenor.
Ya ka Regional Committee ka West Jaiñtia Hills u khlieh da u Sniawbhalang Dhar, Minister i/c Urban Affairs kam u Chairperson, u Lahkmen Rymbui, Minister i/c Home kam u Member, u Comingone Ymbon, MLA, Raliang Constituency kam u Member, u Nujorki Sungoh, MLA, Mowkaiaw Constituency kam u Member, u Thombor Shiwat, CEM, JHADC kam u Member wa u Deputy Commissioner, West Jaiñtia Hills District kam u Member Convenor.
Kini ki le tylli ki Regional Committee toh u ya krehlang ki wa ki Regional Committee yong ka sorkar Assam yow paitlang yei pyrtuid ki chnong, ki thaw kiwa da kam da ka Meghalaya katkam kiwa em ha ki kot ki sla ka Assam.
U pait ya u pood wa sdang wa kut ki chnong, katwon ngut kiwa chong chnong katkam ka Census kamjooh ki jaitbru wa sah ha kini ki chnong.
Da toh u lai hiar leh cha kawi pa kawi ka chnong wei wow yaklam wa kiwa chong chnong deiwa emlang kiwa mihkhmat ki Autonomous District Council wa kiwi kiwa chah ktah na ini yow sñiawthooh kammon sñiaw wei kwah ki paidbah wa kiwi kiwi de.
Kini ki Committee hap ki wow pynpoi ya ka bui (Report) cha ka sorkar Meghalaya hapoh 45 sngi nadooh wa pynbna ya kini ki Committee wei hawa leh ya ini waroh hap wow pait leh yei parom yong rim, ki jaitbru wa sah ha kini ki thaw, i suk yei rukom synchaar ya kini ki bru wa u pood uwa pteiñ khlem kut kamjooh i sur yong ki paidbah.
