Ka United Democratic Party (UDP) ynne ka sngi da pynlait ko ya kular Election namo ka Manifesto neibynta kani ka Election MLA 2023 kawa da booh thong wow wanrah yei synchaar wa khooid wa lait nei baamtooh, kawa ye wow pynmihsoh wei kawa man salonsar neibynta waroh kiwa chong chnong.
Da kular wow wanrah yei sumaar sukhær ya kiwa kjut wa chitom iwa yoh salonsar da waroh, u pynbha pynmiat ya ki thaw sumaar, u pynduna yei khlaad ki manbei wa khakhon, u pynbiang yei e tika, u pynku yeiwa e yarap hapoh ka MHIS, u pyndooh yei dih drug wei wow pynchlur yei pynemkaam yei dawai kynbat.
Heiyatoh waka puræ puthi, daw saam kot dei mynkna cha waroh ki khynnah wa wan na ki manyung wa dooh wa duk, u pynbiang ya ki thaw puræ sorkar, u chna ki skur wa kyrpang neibynta ki khynnah wa emkaam yei yarap wa kyrpang wei wow pyntikna wa waroh ki Residential School u man ki kiwa krehkaam noh.
Neibynta ki warep won daw e ya ki symbe wa ye u pynmih chiboon ki mar rep, daw e yarap poisa leh cha kiwa psan dakha, kiwa chna baam, kiwa ri mrad, kiwa ri ngap wa kiwa thung syntu. U pynbiang ya ki thaw booh ya ki jhoor ki jhep yow lait ki wow pyut wei wow yarap leh ya kitu ki warep ha ki thaw wa khian wa kiwa kreh mylla leh ha ki kaam rep.
Da kular leh wow pynkhlan ya ka chnat pulit, wei wow pyndap ya kiwa boon ki kreh pulit wa lait, u booh ya ki pulit wa kyrpang ki wow pait ya u pood wa kiwi ki jylla wa kamjooh kiwi ki ri. U leh deiwa eh ya ki seiñ kieñ suloi, kiwa dawa poisa wa kiwi de ki kaam wa man pyrchah ya ka aiñ kiwa toh u pyndep hei por wa da booh.
Ya ki kaam uiñke suwari daw pynchlur da kiwa bha neibynta ka rymaw, kiwa yatoh waka dustur riti, ki baam tynre, ki that tynre wei daw e yarap poisa leh hei dur ka Subsidy.
Ya ki khynroo daw booh ya ki Youth Training & Skill Institute, u pynchlur wow sdang khih ki, u pynbiang ya ki thaw yaleh Sport, ka tem ka put wa kiwi de ki sap ki tap yong ki.
Neibynta won kiwa yaleh kreh da kular wow pyndap ya waroh ki kreh sorkar wa lait, u pait biang deiwi yei rta kiwa yaleh kreh, u pyntikna wa ka MPSC wa DSC u pyndep ki yei thap kreh hei por wei wow pyndam leh ya ka Personal Interview neibynta ki Grade III wa Grade IV wei ya ki Personal Interview u leh deiwa riñ dur. Daw pait leh yow pynman noh kam kiwa kreh sorkar pura ya kitu kiwa kreh kam ki Casual wa Contractual. Ya ka Reservation Policy leh daw pait ka deiwi.
Daw booddien leh yei pynkrehkaam ya ka ILP waka MSSRA wei wow pynbor ya ka sorkar pyrdi wow tipmit noh ya ka ktien Khasi wa Garo.
Heiyatoh won wa i tih marpohkhyndaw, daw pyntikna wa ka aiñ MMDR u pait u kynthuplang ko ya kiwa khian wa nai.
Daw chimkhia leh wow pyndep ya ka New Shillong Township yow pynkyllooid ya ka nongbah. U pyndep leh ya u sarok Eastern wa Western Bypass. Wei wow pynbait leh yei rukom noh jhep wa kiwi kiwi de kiwa yatoh wa ki kaam bordiñ wa ki kaam poisa poilaiñ.
