Jowai: U Working President ka United Democratic Party (UDP) u Bindo M Lanong ynne ka sngi da kyntu u ya ka National People’s Party (NPP) wow pyrkhat chwa wow skhem ka sorkar jylla.
U Lanong da ong u ya ini deiwa pyrkhat yei skhem ka sorkar Meghalaya Democratic Alliance (MDA) wa ki lok yong ka kiwa ya krehlang khamtam ya ka NPP wow em ko ya u kyrtong wa hunlang neibynta ka chuki Shillong ha ka Election Lok Sabha ha u 2019.
Da ong u leh wa ye ko u wanrah ya i kyllooh ka sorkar tangwa oo wa u Jemino Mawthoh ym em ki ka thong wow leh ya ini.
Da ong u leh wa lada ka NPP kwah ko wow pynyeiñ da u yong ka hi u kyrtong ye ko u pynboor ya ki seiñ ri-loom wow pynyeiñ da u yong ki hi u kyrtong hadooh ha Tura.
Da ong u leh wa ka Central Election Committee da rai ko wa ka UDP daw pynyeiñ kyrtong ko ha Shillong wei ha Tura wei da e laad ko ya ka NPP.
Da pyntip u leh wa u Paul Lyngdoh wa u Jemino Mawthoh da pynsniaw ki wa kwah ki u yaleh MP wei ka Party daw pynbna ko ya u kyrtong ha ka 31 tarik uni u bnai.
Heijooh i por leh ka Chief Election Committee ka UDP da pynlait ko ya ki kyrtong wa nyngkong neibynta ka Election MDC 2019.
Ha kani ka thup wa nyngkong da pynmih yei pyrtuid ki 10 ngut wa kynthup chwa ya ki kyrtong ka KHADC kiwa man kamni ha wah:
Embhahlang Syiemlieh – Mawlai, Ricky Shullai – Laban Mawprem, S Basing Roy Kharshandi – Nongthymmai, Donkupar Sumer – Umsning, Rona Khymdeit – Nongpoh, Teinwell Dkhar – Shella, Titosstarwell Chyne – Sohra, Oland Suin – Mawsynram, Macdonald Kharkongor – Mylliem and Khamshai Lyngdoh – Mawphlang-Diengiei.
Da chna leh ya ka Manifesto Committee kawa em u Bindo M Lanong kam u Chairman, u Jemino Mawthoh kam u Secretary wa ki dkhot u Teinwell Dkhar, Moonlight Pariat, Lamdibok Sumer, Finely Bareh, Donbok Khymdeit wa u Equator Nongrang.
Discussion about this post