Ka Central Election Committee ka Bharatiya Janata Party ynne da pynbna ko yei pyrtuid ki kyrtong neibynta waroh 60 tylli ki Constituency wa em hapoh Meghalaya wa kynthup ya 6 ngut ki kynthai.
Yei pyrtuid kini ki 60 ngut da mynjur ha ka yalang wa da emlang u Narendra Modi, Prime Minister, u Rajnath Singh, Minister of Defence, u Amit Shah, Minister of Home Affairs wa kiwi de ki dkhot ka Central Election Committee ka BJP.
Na Ri-loom Jaiñtia da pynbna yei pyrtuid u Rimiki Sari na 1-Nartiang Constituency, u Allan Keith Suchiang na 2-Jowai Constituency, u Lakhon Biam na 3-Raliang Constituency, u Currentis Rabon na 4-Mowkaiaw Constituency, u Krison Langstang na 5-Sutnga Saipung Constituency, u Bhayes Chyrmang na 6-Khliehriat Constituency wa u Firstborn Manner na 7-Amlarem Constituency.
Da pynbna leh yei pyrtuid u President ka BJP Meghalaya, u Ernest Mawrie uwa daw yakhun na 18-West Shillong Constituency wei da pyntikna leh ya u Martin M Danggoo kam u kyrtong ka Party na 35-Ranikor Constituency.
Kam wow pynkynmoo wa ka BJP ha u 2018 da yakhun ko na 47 tylli ki Constituency wei da jop ko na ar tylli donhi.
