theme-sticky-logo-alt
theme-logo-alt

Pynbna sa ka Synjuk Waheh Chnong East Jaiñtia ya ki kyndon yalap Election

Ka Synjuk Waheh Chnong East Jaiñtia Hills District, ha ka Executive Committee yong ka kawa da pynman ha ka 23 tarik uni u bnai ha Khliehriat, hadien i yaphyllu wa joor hajrong i emkaam wow pynneh pynsah ya i chongsuk chongsaiñ, wa neibynta i bha i miat, wei kamjooh leh neibynta i yaleh wow wanrah ya ka Election kawa khooid hapoh yong ka thaaiñ East Jaiñtia Hills District, da kawi ka yumut da rai ko wow booh noh da ki kyndon kiwa rkhiñ bha neibynta kani ka Meghalaya Legislative Assembly Election 2023, wei kitæ man ki kamni ha wah:

U chah du hapoh 15 tylli donhi ki kari khian kiwa kynthup wa ka kari yong u kyrtong (Candidate) neibynta kani ka Election 2023 wow psiah cha kawon kawon ka chnong kawa em hapoh u pood u ang yong ka District hawa u kyrtong lai li pynman u yei yalap Election paidbah ki yong oo.

Lada emkaam i lai paidbah namo ka Rally, u chah u pynman Rally paidbah du chisien donhi neibynta uwi u kyrtong.

I por yalap Election toh u man ko katkam i por wa da booh da ki bor sorkar wa toh u pait yeini weiwa ym chah u pynjakhlia ya ka soodong sookun heipor yalap Election.

Ym chah ya ki bru na baar chnong wow psiah ki cha ka thaw yalap Election paidbah yong u kyrtong, lait noh na kitu kiwa bood ya oo, kiwa da wan lang wa oo hapoh yong kitai ki 15 tylli ki kari wa ki tre chnong yong katu ka chnong ha kawa u kyrtong lai yalap Election paidbah u.

Kamtæ, neibynta itai i yumut wa bha haneiñ, ka synjuk kyrpaad ko ya i yakrehlang yong ki Dorbar Chnong waroh hapoh yong ka East Jaiñtia Hills District heiwa u sñiawbha ki u pynkrehkaam ya kitai ki kyndon wa da kdaw haneiñ hapoh chnong poh thaw yong ki.

Kamjooh leh da kyntu ya waroh ki kyrtong ha waroh artylli ki Assembly Constituency yong ka District wow yakrehlang ki wa ka synjuk wei kamjooh leh wa ki dorbar chnong hapoh yong ka East Jaiñtia Hills District, deiwa bood ryntih ya kitai ki kyndon yong ka seiñ kiwa da kdaw haneiñ.

Chooh chooh, heiyatoh wa kitai ki kyndon haneiñ, lada ki chnong hapoh yong ka East Jaiñtia Hills District dang ye ki hei wow pynbha chooh chooh ya kitai ki kyndon yong ka seiñ kiwa da kdaw haneiñ, katkam wa da yoo wa da em leh ki kattu katni tylli ki chnong ha East Jaiñtia Hills District kiwa da dep leh kamtæ rap bha chooh chooh, kani u nang man ko i kyrkhu iwa khroo ya ka thaaiñ East Jaiñtia Hills District.

Heiyatoh wa kini ki yumut yong ka seiñ, ka Synjuk Waheh Chnong East Jaiñtia Hills District, deilang wa ka dorkhat da dep yachem wei yaklam haroh ko wa u Deputy Commissioner yong ka East Jaiñtia Hills District, wei wa da kyntu ko ya oo wow pynsmat u hei wow phah ya ki laad yarap heiwon iwon i por wa kawon kawon ka chnong namo kiwon kiwon ki bru emkaam ki yei yarap iwa jhan.

Heijooh i por leh, ka synjuk kyntu ko ya waroh ki paaid ka District wow sñiawbha ki wow yakrehlang neibynta u pynneh pynsah ya ka chongsuk chongsaiñ, wei i lai bait lai ryntih wei kamjooh leh yow wanrah ya ka Election kawa khooid kawa suba hapoh chnong poh thaw wa ha ka thaaiñ East Jaiñtia hi waroh kawi.

Kani toh, katkam ka Wyrta wa da pynlait da u President, u Hambertus Nongtdu wa u General Secretary, u Jespar Bareh yong ka Synjuk ki Waheh Chnong East Jaiñtia Hills District.

Share this:
Previous

Da ka Cycle Rally lehkmen ka East Jaiñtia Hills ya ka National Voters’ Day

Next

Soo ngut ki Home Guard ka Meghalaya wa yoh ya ka President’s Medal