Ka lyngkhooh sngi yap wa 150 snem u khlwait ka Ri-loom Garo, u Pa Togan Nengminja Sangma da leh warom ya ka ynne ka sngi ha Chisobibra wa em hajan Williamnagar.
Ha kani ka sngi u Montri Rangbah ka jylla, u Conrad K Sangma da chimbynta u hei emlang u Government Chief Whip, u Marcus N. Marak, u Chairman ka Meghalaya Transport Corporation uwa man leh u MLA ka Rongjeng, u Jim Sangma wa kiwi kiwi de.
U Conrad hawa e yei klam da yaroh u ya uni u khlawait ka Ri-loom Garo wa ki kaam wa da leh u neibynta i laitlooid ka ri.
Da ong u wa toh i kaamram yong i waroh wow kynmoo ya ki kaam wa da leh ki khlawait ka jylla wei toh u pyntikna wa ki juk wa bood leh u leh ki yeini.
Chooh chooh da ong u wa toh kam kini ki yalang wa ye i wow kynmoo ya ki khlawait.
Ha kani ka sngi da pynlait leh ya ka Postage Stamp yong u Pa Togan Nengminja Sangma da u Conrad deilang wa kiwi kiwa chah khut sñiawbha.
U Conrad da pynbna u leh T. 50 lak wow pynmiat ya ka Pa Togan Nengminja Sangma Memorial Park ha Chisobibra wei i kreh leh daw sdang noh i.
Ha kani ka sngi da booh leh ya u mooyurim yow chna pynmiat ya ka yingkieñ ha ka wah Rongon kawa em ha u sarok Rongbing Boldak wa lai cha Chekwebibra wei i lut da kynjoh i T. 7.81 klur.
Da booh mooyurim u leh neibynta ki sarok (Internal Roads) ka chnong Williamnagar ha i lut wa T. 27 klur.
U Conrad da ong u leh wa ka sorkar da chimkhia bha ko wow wanrah ya ki kaam pynroi ya ka East Garo Hills wa ka sorkhian Wilimnagar.
Ha kani ka yalang da khana u leh ya kiwa boon ki kreh sorkar kamjooh ki Scheme wa da pynkrehkaam ka sorkar neibynta ki warep kamjooh ki khynroo.
