U Montri Rangbah ka jylla, u Conrad K Sangma ynne da ong u wa ka sorkar MDA wa yahkhmat ka NPP da sdang ko ya ka Scheme neibynta ki warep ya kawa tip kam ka FOCUS ka wow myntoi ki 4.5 lak ngut hapoh ka jylla.
Da ong u wa da sdang ya ka hadien wa chah ktah ki warep na i wan ka khlam COVID-19 heiwa da pynlang ya ki warep hapoh ki seiñ wa tip kam ki “Producers Groups” wei i e yarap T. 5,000 samen hapoh kini ki Group.
Ynne ya ka FOCUS Program da pynman ha Chokpot, South Garo Hills heiwa da ekti ya ki Cheque wa T.1.2 klur cha ki 170 tylli ki Producer Groups.
Ha kani ka jooh ka sngi da pynman ya ka SHG Mela heiwa da e yarap T. 1.001 klur cha ki 29 tylli ki Village Organisations wa ki SHG.
Da pyntip u leh wa ka sorkar da sdang ko ya ki kaam yarap wa ha rukom wow pynchlur ya ki bru wow yieñ ki ha ki kjat yong ki hi deiwa kyntu ya ki paidbah wow chim kabu ya kini ki laad yarap ka sorkar.
Da pynbna u leh ya ka T. 100 klur neibynta ki kaam pynroi ha ka thaaiñ Chokpot, South Garo Hills, kiwa kynthup ya ka Chokpot Water Supply, Guest House, ka Civil Sub Division Building wa ki sarok.
