U Montri Rangbah ka jylla, u Conrad Sangma da pynlait u ya ka Roadmap neibynta wow pynku pynroi ya ka Meghalaya deiwa booh kyrpang hakhmat ya ki khynroo, u pynmahajaon yaka dustur riti waka khayi pateiñ kawa neh wa sah. Yeini u leh deiwa yarap ya ki khynroo wow sai yei sap yong ki ha ki kaam chna phlim, i tem i put, ki kaam uiñke suwari wa kiwa seiñ khih.
“Kwah O ya ki khynroo ym du wow yimphoo ki tangwa wow pynmankaam yeiwa angnood ki, wow wanrah yei buit wa thymme wei wow yah ki nahkhmat wei deilang u chna i ya ka jylla kawa stat, kawa kduplang ya waroh wei kawa heh wa san deiwa ye u pynneh,” da ong u Conrad.
U Conrad da klam u leh chaphang ki kaam chna phlim deiwa pynchlur ya ki khynroo wow pyrchang ya kiwa boon kiwa thymme hawa pynmih phlim neibhah ka sorkar kwah ko wow pynku ya ki kaam chna phlim deiwa pynchlur ya ki khynroo khyllood ka jylla.
Da ong u leh wa da em kiwi de kiwa da dep wow sdang kam ka Meghalaya Grassroots Music Festival yow pynyoo yei mahajon ka Meghalaya ha ka dustur riti cha ka pyrthai.
Da e nongmuna u yei jop wow pynkrehkaam ya ka Lakadong Turmeric Mission deiwa ye u pynmih 50,000 Metric Ton deiwa ya krehlang 12,000 ngut ki warep wei ya ki thaw wa kreh ya u chyrmit da emkaam bait da ki bor ka sngi iwa pynyoo wa ka Meghalaya da yahkhmat wow kreh deiwa ye u pynneh pynsah i wym ktah ya ka rym-aw. Chooh chooh da ong u wa da em 45,000 tylli ki Self Help Group yong ki kynthai iwa pynyoo yei kreh chitom yow pynkupbor ya ki kynthai hei khih i khan.
Da pynkynmoo u leh ya ka CM-ELEVATE kawa dang dep sdang neibynta ki 20,000 ngut kiwa kwah u seiñ khih heiwa ka sorkar u kyrchaan poisa ko hadooh 75%.
Chooh chooh da ong u wa hap wow pyrkhat leh heiyatoh waka bei rym-aw khamtam manda tih marpohkhyndaw deiwa emkaam leh wow yoh i kyrchaan na kiwa chong chnong neibhah i miat ka rym-aw hapoh ka jylla ye ko wow sdang ya ka uiñke suwari kawa ye u chim dor deiwa sy’at ya kiwa wan uiñke deiwa chimbynta lang kiwa chong chnong.
Yow leh yeini da ong u wa u ya krehlang wa ki ri ka South East Asia deiwa bood yeiwa da leh ka ri Vietnam. Da e khublei u leh yei yarap ka sorkar India yow pynbiang ya ki luti syngkieñ kamjooh ka luti na suiñ wei wow pynbiang umkor lyngba ka Jal Jeevan Mission heiwa da ye u pynpoi umkor na 0.75% cha 61% deiwa booh thong 90% kat ha u Wisu (Mar) 2024.
U Conrad da khana u leh wa dang em i yaklam wa u Prime Minister ka ri yow pynku u kyntu ya ka tem ka put ha ka rynsan wow ye pyrthai waroh u yoo yow pynbnanaam leh ya ka dustur ka jylla.
Discussion about this post