Jowai: U CEM ka KHADC u HS Shylla hawa yaklam ha ka yalang paidbah wa pynman da ka CoHSO ynne ka sngi da beiñ joor u ya ka sorkar jylla wei kamjooh ya ka sorkar pyrdi deiwa ong wa i pynsñiaw yei pyrchah ya ka CAB ym em yumut de ko neibha u Narendra Modi da dep chet u ya i ja wei emkaam toh wow pynbor da iwa eh ya ka sorkar jylla wow hukum ya u Lat wow soi noh ya ka aiñ ILP kawa da dep phah da ka KHADC.
U Shylla da pynbna u leh da wa mih u naka NPP nadooh ynne ka sngii, da beiñ u leh ya u montri rangbah ka jylla u Conrad K Sangma uwa ym pu sñiawthooh ya ki aiñ hadooh wa da man u kam u khynnah skur. Da ong u wa ka sorkar MDA toh u pynman aiñ noh ko ya ka ILP, ka Clan Bill wa ka Khasi Social Custom of Lineage Bill hapoh chi tayaw wei lada ym leh ko, toh u mih paidbah biang wow pynjoor yei yakhih pyrchah ya i dawa wei da tyrwa u wow pynyoh 5 lak ngut ki bru wow chimbynta.
Ha i jooh i por da ong u wa ki paidbah ymtoh de u chaniah ki ha ki seiñ saiñ pyrthai nadooh ka NPP, UDP, Congress, PDF, HSPDP wei da toh u sai ki seiñbhalang wa ki paidbah ya u kyrtong wow yakhun MP.
Da pynrap u deiwa ong u wa du ka ILP kawa ye u khanglaad ya ki baar ri wa ki baar jylla wow chong chnong ha kani ka jylla wei kamjooh ka Lineage Bill wow khang ya ka chongkha khleh.
U Shylla da beiñ u leh ya ka sorkar jylla kawa da thmu wow pynkrehkaam ya ka Entry wa Exit Point wa ya ka aiñ wa da wanrah da ka sorkar warim wa yahkhmat da ka Congress, ka Meghalaya Residents Safety and Security Act deiwa ong wa man ko kam ka aiñ wa khlem lameiñ wa da wanrah da u Mukul Sangma ha u snem 2016 wei katni da thmu wow pynkrehkaam da u Conrad Sangma.
Chooh chooh da ong u wa ka sorkar India toh u pyndam noh ya ka CAB wei ka sorkar jylla toh u pdiang noh ko ya ka ILP wa da mynjur da ka KHADC neibhah ki paidbah ym kwah de ki wow yaklam ya ka jooh chi ka jooh wow yada ya ka jaitbru neibhah ki paidbah kwah ki wow yaklam noh wow pynku ya ka yoh ka kot.
Discussion about this post