U Montri ka sorkar pyrdi uwa pait ya ka Road Transport and Highways, u Nitin Gadkari, ynne da booh mooyurim u ya ki sarok thymme wei da wai u ya ki 6 tylli ki sarok National Highway ha Meghalaya kiwa dadep chna hei lut wa dapoi ₹3,214 klur ha ka yalang wa da pynman ha madan Polo, Shillong.
U Nitin hawa e yei klam da ong u wa ki kreh yow chna National Highway toh kiwa da chongdor kamwa ₹52,400 klur hapoh ka jylla. Ki kreh neibynta 820 Km toh kiwa dadep wei kiwa dang sah toh kamwa 310 Km, katwa kiwi won neibynta 450 Km toh kiwa da pynkhreh yow wanrah.
Kiwa dadep pynkreh ha ki snem wa da lai toh ka Shillong–Nongstoin–Tura Trans Meghalaya Highway kawa da pynman yei lai luti na Shillong cha Tura wow hiar cha 6 kynta na 12 kynta.
U sarok Jorabat–Umiam Four-Lane Road, u Tura–Dalu Road, u Jowai–Malidor Road wa Ranikor–Baghmara Road toh kiwa da yarap wow pynyabi na kawi cha kawi ka thaw hapoh ka jylla wa ha ki thaw khappood.
Da pyntip u wa ka Package-I ka Shillong–Dawki Road Project toh kawa da pyndep wa jrong 11 Km hei lut wa ₹351 klur. Ka Jowai Bypass Project kawa da pyndep hei lut wa ₹106 klur uwa jrong 5 Km.
Heiyatoh wa kini ki 6 tylli ki National Highway kiwa dadep chna, da wai ki ynne ka sngi, wei kini toh kiwa jrong 117 Km wei da lut palat ₹3,214 klur yow chna ki.
Da booh mooyurim u ya soo tylli ki National Highway Project kiwa dang thymme, kitæ ka Tura Bypass Project ha u NH-127B wa NH-217 wei kini toh kiwa jrong kamwa 29 Km hei lut wa ₹952 klur.
Ka Durgiri–Phulbari Bridge cha Selsella–Simbukolgre (Package-I) ha u NH-127B wa jrong 32 Km daw chna hei lut wa ₹737 klur wa daw yabi wa ka Dhubri–Phulbari Bridge najrong ka wah Brahmaputra.
Ka Pynursla Bypass Project ha u NH-206 kawa 8 Km wa daw chna hei lut wa ₹564 klur. Kani ka sarok daw yarap ko wow pynkyllooid ya ka chnong Pynursla wei daw pynsmat leh yei lai cha Dawki wa ki thaw uiñke suwari kani ka thaaiñ kamjooh ka khayi pateiñ cha kylla pood.
Ha ka Package-II won toh u sarok Selsella–Simbukolgre cha Koiragre wei uni toh uwa jrong 32 Km hei lut wa ₹504 klur uwa daw yarap yei lai i wan ha West Garo Hills.
U Nitin da khana u leh wa kattæ dang pyrkhat neibynta Shillong–Dawki Corridor yow pynsuk yei khayi wa ka Bangladesh lyngba ka Tamabil.
Heiyatoh won wa u 4-Lane Greenfield Shillong–Silchar Corridor, uwa daw chna hei lut wa ₹23,000 klur uwa jrong 165 Km, daw pyntbian yei por na Shillong cha Silchar da chiteiñ kamjooh daw smat leh u lai cha Tripura, Mizoram wa Manipur lyngba ka Silchar.
Da khana u leh wa dang em sa uwi u sarok wa da pyrkhat u chna, utæ toh u 4-Lane Greenfield Jorabat–Barapani Corridor, hei lut wa ₹8,500 klur uwa jrong 66 Km yow pynsmat yei lai na Guwahati cha Shillong deiwa lut por chi kynta donhi wei mynried daw man u leh kam chibynta ka High-Speed Siliguri–Guwahati–Shillong–Silchar Economic Corridor.
Da kdaw u leh yeiwa emkaam u sarok Darugiri–Baghmara–Dalu kam chibynta u NH-217 uwa daw chna hei lut wa ₹4,000 klur uwa jrong 136 Km wei uni daw pynsuk u ya ka Garo Hills wa kiwa em pood wa ka Bangladesh.
Discussion about this post