U MDC warim ka Nangbah Constituency, u Shemhok Garod ynne ka sngi da pynbna u wow yaleh Election MLA 2023 na ka 3-Raliang Constituency lada man katwa man leh wei ymtoh wa i yieñ yaleh Election u toh wa em wa phah pynyieñ oo.
Da ong u wa kam uwa da dep man MDC la le sien, ha kini ki soo snem da yoo wa ym em iyi iyi i roi i paar wei ha kini ki bnai wa da dep, da dep lai u cha waroh ki chnong ka 3-Raliang Constituency wei kiwa boon da pynsñiaw ki yei kyrchaan ya oo nadooh ki bor chnong kamjooh kiwa chong chnong kamtæ lada yoh Ticket lane ym yoh Ticket, oo daw lai u chakhmat wow yaleh Election.
Heipor wa man u kam u MDC da ong u wa da wanrah u ya chiboon ki roi ki paar tangwa katni won ha kini ki soo snem chiteiñ wa da lai ym em yoo u iyi iyi i roi i paar hapoh ka Nangbah Constituency. Kamjooh leh da ong u wa hapoh ka 3-Raliang Constituency ki paidbah da chem chitom ki hei lai i wan wym biang ki sarok wa kiwi ki kaam pynroi leh duna bha ki.
Da ong u leh wa sa iwi i daw wa da chim u yaleh MLA toh wa da yoo wa kani ka sorkar MDA hapoh i yahkhmat ka NPP da rem lut ko nadooh neibynta kiwa sikai kiwa da hap ki wow mih u thiah cha sarok. Wei du ha kani ka sorkar wa katni da mih kitæ ki High Level wa ki Low Level wei ym toh wow mih kam kini, toh u man salonsar ha ka synchaar paidbah.
Heiyatoh wa mih ki khubor wa ya oo da pynyaleh da kiwi tawon, da kyntu u ya ki paidbah wa lada em kiwa ong yeini wow sñiawbha ki wow wan cha oo yow yoh yei pynche wei wow khana yei pyrtuid yong kiwa yong yeini yow ye u yaklam neibhah em ka aiñ wow pynchitom ya kiwa klam yei wym em man sakhiat.
Hajrong i paan Ticket naka UDP heiwa u J. Treilang Suchiang, MDC Shangpung leh da paan Ticket lang u naka 3-Raliang Constituency. Ka UDP da thung ko da ki Observer yow lai pait lai ap yei sur ki paidbah yow tip uwon wa em ka laad wow jop. U Shemhok da ong u wa ym em yoo ya kitæ ki Observer ka UDP wa wan ki cha kiwon kiwon ki chnong wei kopsar da leh ki deiwa Phone donhi heiwa da pyntip cha oo da u Secretary ka UDP West Jaiñtia Hills wa wot ha Nangbah leh dang khlan u Treilang bar ya u Shemhok.
Kamtæ da ong u wa toh u takit bniah deiwa psiah cha thlu yung ki bru yow yoh ya ka Report wa biang ym toh deiwa Phone heiwa oo leh yow yoh u ya ka bichaar wa hok. Wei daw yang u yei rai ka UDP chwa wow chim yei rai.
