Ynne ka sngi u MLA ka Jowai, u Wailadmiki Shylla da pynbna u wow e T. 5 lak cha ka Kur Sookpoh Khadar Wyrnai, Jowai wei ya ini da pynbna u ha ka yalang wow wai ya ka Fete wa ar sngi ha Yung Kur wa em ha Chiliangraij, Jowai heiwa u Wailadmiki da man u kam u kongsan hei emlang u Principal ka North Liberty Higher Secondary School, u Richard Uriah kam u symbood kongsan, u MDC ka Jowai South, u Saron Paswet wa kiwi kiwi.
Ya ka yalang da pynlai da u Dolloi ka Elaka Jowai, uwa man leh u President ka Kur, u Puramon Kynjing wei da yoh ya ki kyntien ngoohblai na u Asst. Secretary ka Kur, u Damanhaoo Rangad.
U Richard hawa e yei klam da e yaroh u ya ka kur wa da kreh ko ya ki kaam wa boon bha dei yatylli ki khon ka kur kiwa kreh neibynta i bha i miat ka imlang sahlang.
Neiliang u kongsan ha kani ka sngi, u Wailadmiki Shylla da dap u dei kmen wow yoo wa ka kur da heh da kmai ko katni nadooh i por wa da seiñ ya ka sor Jowai da man ko kawa sbun mynsien wow e ya ki thaw cha kiwi ki kur ha ki por nachwa.
Da ekhublei u heiyatoh wa i thaw mynkna wa e ka kur wow chna ya ka Loomkyrwiang UPHC ya ka wow wai noh ya ka ha u Naisan uni u snem.
Wei heiyatoh wa i chna ya i thaw ka kur ha Mynthong, neiliang yong oo da kular u wow e T. 5 lak na ka MLA Scheme neibynta iwon iwon i kreh ha ini i thaw (ha Mynthong).
Ha kani ka sngi da yoh ya ki kyntien lamkhmat na u Lamwan Paswet, uwa da khana ya ka parom hajrong ka kur heiwa da pyntip u wa da sdang seiñ ya ka Seiñkur ha u ka 24 Wisu 1964 wow wanrah ya i yatylli khlem pait ya i ngait niam yong ki para kur wa kiwi ki kaam wa yatoh wa i bha i miat ka imlang sahlang khamtam heipor wa wan ka kjut khlam COVID-19.
Ya ka yalang da pynkut da ki kyntien khunlei na u Marryngkat Syngkon.
