Neiliang u Overcome Dkhar uwa man kam u Information Secretary ka JCOMSWA, da pyntip u wa kam ka seiñ ym em chong-ngiah ko wow pynkreh ya ki kaam nadooh ka sngi wa sdang wow chah thngan u President hadooh kattæ wa dang lai chaaid chaaid ki kaam wa yatoh wa u mooyong neibynta kiwa khian wa nai.
Da pyntip wa ka JCOMSWA dadep chong yachem ko wa ki heh sorkar nadooh ka 23 tarik u bnai wa dep yow yatai neibynta ki Scheme neibynta kiwa chah ktah nei khang mooyong tangwa ym em poi ko cheiwon cheiwon.
Hadien ini da khut yachem biang wa ki heh sorkar ha ka 29 tarik iwa khlem poi biang cheiwon cheiwon wei da khut biang ya ki ha ka 3 tarik uni u bnai heiwa ka JCOMSWA ym em pyndem ko hakhmat ka sorkar heiwa u President yong ka ym em pynjem u deiwa ong wa hap wow wai ya u mooyong yow yoh u krehlang kiwa khian wa nai ym du kiwa em bor.
U President ka seiñ da ong u leh hakhmat ki heh sorkar wa daw hap maad ki yei yakhih wa eh lada ka sorkar ym ap ko yei suk kiwa dooh wa duk wa yei hok yong ki iwa da chah knieh la 12 snem kattu.
Kamtæ da dawa wow wai biang ya u mooyong kam nachwa ya waroh wei lada ym leh yeini daw chim da ka luti wa khor.
Da kular leh ya ki paidbah wym pyndem ha kiwon kiwon kat wym pu wai ya u mooyong wei da kyrpaad ya ki paidbah wa manda toh i por wow ya mih chakhmat deiwa ya krehlang yow yoh yei jop yow wai ya u mooyong.
Discussion about this post