Pynche ka NPP ya ka Rs. 1 klur wa yoh kem ki pulit na ka kari wa bood tdong ya u Conrad

Ynnin ka sngi da yoh wow kem ka poisa wa Rs. 1 klur ha Kanubari Check Gate wa em ha Longding District ka Arunachal Pradesh da ki Static Surveillance Team (SST) deilang wa ki Flying Squad Team (FST) heipor wa pynsangeh kari.

Ya kani ka poisa da chem napoh kawi ka kari Toyota Fortuner wa em Number AS-01ET-5252 kawa mantre da u bru wa tip kam u Harshvardhan Singh uwa na Duliajan, Dibrugarh Assam heiwa na kani ka kari da chem 200 tylli ki Bundle ki kot Rs. 500 kiwa dapoi Rs. 1 klur wei da e kti cha u District Election Officer yow ksoh ya kani ka poisa.

Hadien ini da mih ka khubor wa kani ka kari wa chah kem toh kawa bood ya ki kari lai yalap Election u Montri Rangbah ka Meghalaya, u Conrad K Sangma uwa da lai cha Longding ynnin ka sngi heiwa ha Arunachal Pradesh da pynman ya ka Election MLA waka Election MP heijooh i por.

U SP ka Longding da ong u wa kani ka kari ymtoh kawa lai lang wa ki kari u Conrad tangwa kawa da bood tdong nadien wei uni u Harshvardhan Singh toh u Executive Director ka Badri Rai Company kawa man leh ka Company wa pynchna ya ka yung dorbar chna aiñ wa thymme ka Meghalaya.

Related posts

Ym bien de u George wow yakhun MDC na ka Congress

December 27, 2024

Dawa ka BJP Meghalaya wow pynchitom ya uwa leh ya ki kaam wa ktah yei sñiaw ki Christan

December 27, 2024

Neiliang u tre da ong uwa kani ka poisa toh yow su ya kiwa kreh yong oo ha ki kaam wa dang pynkreh u ha Sonari Medical College wa Sivasagar Police Battalion, Assam nitæ ka Brigade Headquarters wa em ha Tirap District ka Arunachal Pradesh wei neiliang ka Income Tax Department da sdang ko wow pynman yei takit.

Heiyatoh wa ini, neiliang ka NPP da pynche ko wa u Conrad lai hi u cha Longding yow yalap Election neibynta ki kyrtong ka Party ha Arunachal Pradesh wei kani ka kari wa chah kem ymtoh kawa lai lang wa ki kari ka Party tangwa kawa bood hi-eh khlem tip ki.

Ka Party da ong ko wa u SP ka Longding leh da pynsakhiat u wa kani ka kari ymtoh kawa lai lang wa ki kari u Conrad wei waroh ki kari wa lai lang wa oo da dep ki wow leh yaka Security Check katkam ki kyndon wei ym em chem iyi iyi wa lait.

Chooh chooh da pynche wa manda poi ha Kanubari Check Gate, neiliang ki FST, SST wa ki pulit da pait da sylli ki ya waroh ki kari wa kynthup ya ka yong u Conrad wei ym em chem ki iyi iyi wei da lai ki chakhmat.

Da ong leh wym tip ki yeiwa em ka kari wa bood tdong nadien wei wa chah kem ko kat hadooh wa mih khubor heiwa da pyrchang wow pynngat lang yei pyrtuid u Conrad ha ini wa chah kem katai ka kari iwa ma iwa bakla wei khlem yurim.

Kamtæ da kyntu ya ki paidbah wym toh u sñiawthooh bakla ki.