Pynche ki BSF yeiwa jia ha chnong Kuliang

Ki BSF da pyntip ki wa ha ka 19 tarik uni u bnai heipor kamwa 9:00 waje i miet, da em kamwa 30-35 ngut ki nong Bangladesh kiwa khayi mar tooh kiwa da psiah chapoh India deiwa yarap kiwa chong chnong ka India ha i bynta wym pu em kær pood wa dang haap hapoh i pait ka Border Outpost (BOP) Kuliang wa em da ki 172 Bn BSF.

I thong kini ki nong Bangladesh toh wow chimkti yei chini na kiwa khayi tooh kiwa em ha ka chnong Kuliang.

Ki BSF mar ya tip yeini da lai ki cha kani ka thaw wei mar ya oo kini ki nong Bangladesh ya ki BSF da yut ki cheiliang ka chnong Kuliang. Kamtæ da kdong ya kini ki bru tangwa da mih kiwa chong chnong yow e laad u yut kini ki nong Bangladesh wei da sdang ki leh wow kawang moo ya ki chipai ka BSF wei da tim sih wei maham ki leh ya ki BSF.

Ha ini i ya huri hura, kawi ka kynthai kawa na India da thlieh ko da u sdai ya uwi u BSF uwa da toh na ka kti timun u hadooh wa da mynsoo katwa uwi won u BSF da mynsoo u ha ka kti tidiang nei toh da u moo. Yeini wa jia da pyntip wut-wut cha ki pulit ka Police Patrol Post Umkiang kawa em hapoh ka Lumshnong Police Station ka East Jaiñtia Hills District.

Related posts

Chadooh cha pyrdi sarok poi i jhep ha Jowai

November 17, 2024

Da sdang ya ka JAC ha EJHD wow pynlai bait ya i khayi pateiñ

November 16, 2024

Ki BSF da ong ki wa kani ka chnong Kuliang toh kawa em hajan bha wa u pood ka Bangladesh wei da man ko leh i thaw wa joor bha ka ya khayi tooh. Da pyntip leh wa kiwa chong chnong da murieh ki ya chiboon i chini pyn hapoh ki yung ki sem ki kamjooh ha kiwi ki thaw murieh wei manda yoh laad ki da phah ki ya ini i chini cha ki nong Bangladesh kiwa da chim kabu yei wym pu em kær pood kamjooh heipor wa joor u slap.

Chooh chooh da pyntip leh wa nadooh wa sdang uni u snem, ki BSF wa em ha ki thaaiñ Kuliang da yoh ki wow kem palat 100,000 kg i chini wa da thmu wow chalan cha Bangladesh.

Kamtæ ki BSF da kyntu ki ya kiwa chong chnong khappood wym toh u leh ki ya kini ki kaam pyrchah aiñ kamjooh wow yarap ya ki nong Bangladesh u psiah ki deiwa pynchlur ya ki wow khayi tooh ki. Neibhah ini toh iwa da jia dei langær heiwa kiwa chong chnong ka India kiwa leh ya kini ki kaam pyrchah aiñ da pynthut ki kut wa mut ki BSF wow leh yei kaam yong ki yow khang yeini i chalan tooh ha khappood ka ri.

Ki BSF da ong ki leh wa u pteiñ ki yei kaam yong ki yow khang yei khayi tooh wei heiyatoh wa ini wa dang dep jia, daw ujor leh ha ki Border Guards ka Bangladesh yeiwa psiah tooh ki nong Bangladesh chapoh India.