Pynche paidbah ka Dorbar Chnong Mihmyntdu wa ym em i baamsap hei yatoh wa ka skhim TSC

Jowai : Ka Dorbar Chnong Mihmyntdu hapoh i pyllai u waheh chnong u ma Lakhon Ryngkhlem deilang wa ki waheh dong, ki wa kitkaam ka VEC wa pait wa pyllai yaka Scheme Total Sanitary Campaigned (TSC) næ ka skhim chna paikhana ynne ka 28 tarik u Naikhynde da e ki i pynche paidbah hajrong kani ka skhim ha Madan Thymme Lumpyrdi, Mihmyntdu.

Ha kani ka pynche paidbah da wan ap wan sñiaw da ki spah ngut ki wa chnong chnong Mihmyntdu wa kynthup na ki san tylli ki dong, ka Lumpyrdi, Lumpyrtuh, Lumchyrmang, Riatsaliya waka Mookynphad.

Neiliang kiwa pynlai chnong da pynche ki yei rukom pynkreh ya kani ka skhim chna paikhana katkam wa man, heiwa da ong ki kam wa man katni da yoh dang du ka 1^st installment katwa ya ka 2^nd installment ympu e ka PHE, tangwa na kitai ki san tylli ki dong toh ka Riatsaliya kawa da lai chakhmat hei yatoh wa kani ka skhim kawa da yoh ya ka 2^nd installment.

Related posts

Ym yoh Ticket u Baitlang na ka VPP wow yakhun MDC na Jowai South, paan u yei kyrchaan kam u kyrtong samen

November 12, 2024

La 95% da ye u pyndep kreh ka Scheme saam um ka Mihmyntdu wa chongdor Rs. 32 klur

November 9, 2024

Ha kani ka sngi kiwa pyllai chnong da e laad ki leh ya ki wa chong chnong wow pynsñiaw hajrong i chah kynnoh baamtooh ya kani ka skhim. Kamtæ da em kattu katni ngut ki manbei wa ong wym pu em yoh hanlada dep su ki le spah tyngka chwa wow pyllait ya kani ka skhim, hei yatoh weini neiliang ki secretary da pynche ki wa da yoh ki, tang wym em li thooh ki ya ki tiar kam u kumud wa kiwi kiwi ki tiar chna paikhana na ki wa pyllai dong kiwa toh u pait ya kani ka skim.

Chooh chooh da pynche ki wa yei sakhiat cha waroh ki manyung yong ki dong da dep pyntip lyngba ki chithi, tangwa dang em ki wym pu wan thooh ya ki tiar yong ki wei wym ye ki u lai yachem kut thlu yung neipor cheipor, wei i kaamram yong ki wa chong chnong hi u wan kylli na ki wa kitkaam dong ka chnong.

U ma Kerlang Lyngdoh na ka tnat PHE wa pait ya kani ka skhim da ong u wa kani ka skhim man ko kawa khian, han kattæ leh kyntu u ya ki secretary wow rap pynsmat ki u kreh yow yoh ki sa ya ka 2^nd installment. Da ong u wa na pyrdi ki san tylli ki dong ha Mihmyntdu ka dong Riatsaliya toh kawa lai bha chakhmat i pynkreh.

Neite won ong u lym ye u pyndep ya ka 1^st installment ka ophis ym ye ko u e ya ka 2^nd installment. Kitu won ki dong wa da dep chna wei da yoh pyn ar installment ye won ki u apply ya ka skhim thymme wa hadooh khadar hajar cha neiñ. Heijooh i por kani ka skhim da mang kyrpang nei bynta ki man yung wa dooh tam (BPL) wei u e cha waroh kiwa dooh khlem niaw chiliang tangwa ka wi ka yung ym yoh ko boon tylli ya kajooh ka skhim.