U MLA na Mawlai Constituency u PT Sawkmie da wanrah u hapoh ka dorbar mangposia ka sorkar Meghalaya yaka phang wa yatoh wa i mih paidbah ki boon tylli ki seiñ ha East Jaiñtia Hills yow pyrchah yei wanrah mooyong na Assam cha Meghalaya ha kini ki por wa waroh da hap wow chong khop ha yung yow yada nei poor ka khlam COVID-19.
Da paan u yei pynche na u montri rangbah ka jylla u Conrad Sangma deiwa ong wa ha kini ki por wa ym em ki kari wa lai luti, da khang yei hær ki lieñsuiñ, i lai ki rel hapoh ka ri, tangwa ki krakhana pynmih khyndaw-bilat ha East Jaiñtia Hills kopsar man ki kiwa khlan bor bha hadooh wow yoh bor ki wow wanrah ya u mooyong na Assam cha East Jaiñtia Hills. Wei ini da pynchrai ko yaki bru kiwa em hi u yong ki u mooyong tangwa ym yoh ki oo u tba u challan katwa ya uwa na Assam won yoh u wow poi chapoh ka jylla.
U Conrad hawa e u yei jubab da ong u wa ka MHA da booh ko naki por cha ki por yaki kyndon wei da chah leh wow sdang u krehkaam ki karkhana kiwa em cha palatsor (Rural Area) hadooh iwa pynbiang yei emkaam ki yow ye ki u krehkaam deiwa chah leh yei tih mooyong kamjooh wow kit ya u mooyong. Ka Ministry of Mines leh da pynkynmoo ko yaki jylla wow pyntikna wa i chna ya u Steel, Aluminium, Copper, Cement Plant u lai bait i deiwa pyntikna wa poi ki mar wa emkaam kini ki karkhana u krehkaam.
Da pyntip u leh wa haka 12-04-20 ka MHA da pynche ko wa i lai ki Truck wa kit mar (Goods Carrier) na kawi ka District cha kawi wa na kawi ka jylla cha kawi deiwa em du uwi uwa yah wa uwi wa yarap toh kawa chah deiwa bood thij yaki kyndon wa da booh lada kit ya kiwon kiwon ki mar kamjooh ki truck kiwa thylli hawa lai li thooh ki ya i mar.
Kamtæ ka sorkar jylla haka 01-05-20 da chah ko yaki karkhana Cement wow krehkaam ki 50% na i bor wa ye ki u krehkaam deiwa booh yaki kyndon ka MHA waka MoHFW. Le tylli ki karkhana wa kynthup yaka Star Cement, Meghalaya Cement waka Dalmia Cement Ltd., da paan bor ki wow kit ya u mooyong wa neh ha Railway Siding wa em ha Guwahati. Kini ki karkhana da ong ki wa uni u mooyong toh uwa da poi chwa u sdang ka Lockdown wei da phah leh ki heh ka Railway wow kit noh ya uni u mooyong khlem da pynslem. Wei na ini i daw ka sorkar jylla da chah ko wow kit ya uni u mooyong wa neh ha ki Railway Siding ha Guwahati yow kit cha ki Cement Plant wa em ha East Jaiñtia Hills.
Chooh chooh da pyntip u wa nyngkong da chah 30 tylli ki truck chi sngi wei hadien da pyndam yeini i khang wei toh u lai luti ki du lyngba Byrnihat, kiwa yah truck hap rah ki ya i baam wa da song wei u liwan ki mar ya dep u pynhiar ya u mooyong. Ki Cement Plant toh u pyntikna ki wow bood ya waroh ki kyndon wa booh daka sorkar.
Heiyatoh won wa u mooyong wow dai lilam, da pyntip u wa da mynjur ka NGT wow lilam 2 Lak MT u mooyong wa da dep tih heiwa na uni 75,000 MT toh uwa na East Jaiñtia Hills. Ki Cement Plant leh yei ki wow chimbynta ha kani ka thied lilam ya u mooyong.
Da ong u leh kiwa pyrchah toh neidaw wa khuslai ki yei wan ki truck na baar ym toh ware yei wan u mooyong khatam ya kiwa yah truck. Wei da dep yachem u waki seiñ yow pyntikna yaki wa daw bood thij yaki kyndon.
Discussion about this post