Pynche u waheh chnong ka Nongmulieh hajrong i chah pynbaad u waheh chnong ka Mobakhon

Jowai: U waheh chnong ka Nongmulieh u Merry O Rymbai da pynche u hajrong i chah pynbaad u waheh chnong ka Mobakhon wa da leh chiliang wei pyndooh khoo rachon ya ki kattu katni ngut, deiwa ong wa ha ka yalang kawa man ha ka 30-03-20 ha i por 10 waje i step ha ka chnong Mobakhon da emlang kiwa chong chnong waroh arliang nadooh ka Mobakhon wa Nongmulieh deilang wa kiwa yahkhmat chnong nadooh u waheh chnong ka Nongmulieh u Merry Rymbai wa u Pros Dkhar u waheh chnong Mobakhon.

Ha kani ka yalang da ya rai lang da kawi ka yumut wow e khoo rachon ha uni u bnai du ya kitu kiwa chong chnong kiwa ym em thaw rep wa cha kitu kiwa em thaw rep wei kiwa em boon u khoo ha yung daw e i bhah yong ki cha kitu ki wym em khoo wa ki wym em thaw rep neibhah wa kam ha kini ki por wym em dukan de wa dai ha yaw ha haat wei boon na kini kiwa chong chnong da maad ki yei eh wow yoh ya u khoo uwa biang, kamtæ ha kani ka yalang da rai lang waroh ar chnong lyngba ki waheh chnong wa ki paidbah wow e ya u khoo rachon du cha kitu ki wym biang khoo ha yung han lada ym em Card ki leh.

Kamtæ da kyrpaad u ya ki paidbah chong chnong wym toh u chah yahbakla wei ym toh u sñiaw doohnong ha kam ini i por wa ka ri wa ka pyrthai hap ki wow yakhun eh ya uni u khniang kjut COVID-19.

Kamwa ki bru samen wa ki bru sorkar da pyrchang ki wow noh synniang cha kiwa dooh wa duk wow lait na i yap thngan wei i leh toh u pynskem ya ka rai wow yarap kylliang para i katwa ye i wei ym toh wow pyrchang wow ya pynboodnaam ya ka chnong ka thaw ya kam kini kiyi kiyi wa ye u pynbait hapoh chnong poh thaw.