U Waheh Chnong ka Wahiajer Narpuh, u Sibren Sumer da pynche u heiyatoh wa i mih khubor wa pyrchah ka Wahiajer Narpuh Social & Sport Club wa kiwa chong chnong yaka Public Hearing ka Meghalaya Cement Ltd kawa da mih ha u Wyrta ha ka 18 tarik uni u bnai wa ha kiwi ki khubor.
U Sibren da ong u wa khnang wa ki paidbah kiwa puræ ya ka khubor wa da mih ha katai ka tarik ymtoh u sñiawthooh bakla pyrchah ya oo kam u waheh chnong ka Wahiajer Narpuh, deiwa pynche wa ka Wahiajer Narpuh Social & Sport Club da pyrchah ko ya ka Public Hearing yong ka Meghalaya Cement Ltd ka wow man ha ka 24-08-2023, deiwa pynbaad wa da e NOC da u Waheh Chnong ka Wahiajer Narpuh, East Jaiñtia Hills District.
“Ini i pynbaad u Lami Mukhim wa u Cheerful Surong kiwa man u President wa u Secretary yong kani ka Club toh iwa khlem yurim wei kawa yah bakla hadooh kattæ kattæ khamtam ya ki paidbah ki wym tip iyi iyi chaphang ka Meghalaya Cement Limited, Thangskai,” da ong u Sibren Sumer.
Da ong u wa ka Meghalaya Cement Limited toh ka karkhana pynmih khyndaw-bilat kawa da em 20 snem kattu. Da e NOC ya ka da ka Synjuk ki Lai Shnong-Thangskai Chiehruphi wa Wahiajer Narpuh nadooh u snem 2003. U Waheh Chnong Wahiajer Narpuh ymye u wow e NOC samen neibhah ka MCL haap ko hapoh ki le chnong.
Chooh chooh da ong u wa katkam wa lai i por, ka Meghalaya Cement Ltd da kwah ko wow pynheh ya i pynmih khyndaw-bilat wa Clinker heiwa da pdiang wei da mynjur ya ini i paan ka Meghalaya Cement Ltd wei da e NOC waroh le chnong hadien wa ka Company da mynjur ko wow soi ya ka soskular (Agreement) neibynta i myntoi ki paidbah yong ki le chnong wei ini i pynheh ya ka MCL toh du wow pynmih khyndaw-bilat wa Clinker wei ymtoh wow thied thaw thymme neibynta ini i thmu.
Heiyatoh wa i tdem wa i laphooh, ka MCL da jan dep chna ko ya ka Waste Heat Recovery System wow yada ya i tdem næ laphooh wow poi cha ki chnong.
Kamtæ ka Public Hearing ka wow pynman ha ka 24-08-2023 da ka Meghalaya State Pollution Control Board, neiliang ka Synjuk Lai Shnong- Thangskai Chiehruphi wa Wahiajer Narpuh da rai ki wow kyrchaan ha ryngkat i kyrchaan lang u Dolloi, ki paidbah wa ki Waheh Chnong na ka Elaka Narpuh.
I pynbaad ya u Waheh Chnong ka Wahiajer Narpuh toh wow daisarom wei da kyrpaad ya ka Wahiajer Narpuh Social & Sport Club wow pyrkhat chwa wow pynboodnaam yeiyi yeiyi.
Ini toh katkam ka Wyrta na u Waheh Chnong ka Wahiajer Narpuh, u Sibren Sumer.
Puræ leh: Pyrchah kiwa chong chnong ka Wahiajer Narpuh yei e NOC ya ka Mega Bond Cement
Discussion about this post