Ha ka yalang wa pynman ha DC Conference Hall, Jowai kawa emlang u Deputy Commissioner, u DTO, u DMHO wa u Dy. SP West Jaiñtia Hills wa kiwa kitkaam ka All Jaiñtia Tourist Commercial Vehicle Association (AJTCVA) chirup wa ki Association waphær waphær yong ki kari kamai kiwa em hapoh yong ka ri-loom Jaiñtia, da yaklam kammon wow pynduna yei poor yong u khñiang COVID-19.
Ka AJTCVA lyngba u President yong ka u Paila Kordor Lyngkot da kyntu ko ya ki kiwa yah kari kamai waroh kiwa em hapoh ri-loom Jaiñtia kiwa dap 45 snem chaneiñ wow sñiawbha u mih chakhmat wow lai chim yei dawi tika COVID-19 ha ki thaw wa da pynbait da ka sorkar wei wym toh u tieñ lane wow artatien neibhah ini i tika ym toh wa phær wei man ko wow yada na u COVID-19 donhi.
Da kyrpaad ya kiwa yah kari kamai waroh wow sñiawbha ki leh wow deiñ ya ki Mask hawa lai wa wan khamtam hawa em kiwa chong hapoh kari yong ki. Da kyrpaad leh wow booh ya ki Sanitizer hapoh kari khnang wow yoh pynemkaam heipor wa biah poisa næ heipor wa chim poisa na kiwa chong kari yow ye u pynduna ya i poor kani ka khlam.
Da kyrpaad leh wow man kiwa lehkhooid kam kiwa yah kari, deiwa booh ki muna hapoh kari heiwa kiwa lai wa wan kiwa baam soh, baam baam hapoh kari yow noh bait ki ha kini ki muna yow lait ki u noh kulmar ya ki Plastic song baam lane ki snieh soh cha rood sarok wei manda poi ha ki thaw pynyieñ kari, u man ko i kamram yong kiwa yah kari wow li noh ya ini i jhep cha i thaw noh jhep.
Chooh chooh heiyatoh wa i rukom thap bru, emkaam wow thap kamwa da phah da ka sorkar, wei heiyatoh wa ka bai kari, da kyntu ya kiwa yah kari waroh wym hoi u chim palat ya i dor wa da booh da ka sorkar. Lada em kiwon kiwon kiwa yah kari wa chim kabu lane leh tam, ka Association da kyrpaad ko ya i ya krehlang yong ki paidbah wow sñiawbha u pyntip cha kiwa krehkaam yong ka Association khnang yow ye u leh ya iwa emkaam.