Ka Jaiñtia Tourism & Environment Society (JTES) kawa da jooh pynman yei lehkmen pdiang snem thymme ha man ka 1 tarik kawa jooh e pyrtuid ki kam ka New Year Carnival ha Iawmusiang, Jowai, da pyntip ko wa ha uni u snem ym pynman de ko ya kani ka lehkmen hadien wa da leh yeini la 13 snem.
Yeini i rai da chim da ka JTES hadien wa ka Synjuk Waheh Chnong Jowai deilang waka Tourism Officer ka West Jaiñtia Hills District da pynbna ki ya kam kani ka jooh ka lehkmen haka 1 tarik ha i jooh i por.
Ka Synjuk Waheh Chnong Jowai da thoh ko leh cha ki waheh chnong wa em ha Jowai wym toh u lai chimbynta ki wow lehkmen snem thymme lada em kiwi won wa khut ya ki neibhah ka Tourism Officer da dep ong chwa ko yaka Synjuk.
Neiliang ka JTES da ong ko wym tip ko neiyi i daw wym chah ya ki dorbar chnong wow ya krehlang waka kamwa da jooh tangwa heijooh i por sñiawkmen ko wa ka Synjuk Waheh Chnong Jowai kamjooh ka Tourism Officer da chynna jngai ki yei emkaam wow pynku ya kani ka lehkmen baam doh kut snem wei kamjooh i chaad pdiang burom ya u snem thymme kam kawi na ki laad wow riñ ya kiwa uiñke suwari cha ka chnong Jowai.
Ka JTES haka chithi wa da thoh cha ka Synjuk Waheh Chnong Jowai da ong ko lada tip namo ym tip ki wa ya kani ka New Year Carnival toh kawa da pynman da ka la 13 snem deiwa chna Pandal ha Iawmusiang wei wot haka yalang wa da pynman da ka JTES wa ki waheh chnong haka 20 tarik uni ha Mynthong, neiliang ki waheh chnong da ong ki wa ka JTES toh u pteiñ ko kamwa jooh leh ko.
Tangwa ka Synjuk Waheh Chnong Jowai haka 27 tarik da thoh won ko cha ki waheh chnong wa em ha Jowai wow pyntip cha ki wa ka District Tourism Officer ka West Jaiñtia Hills deilang waka Synjuk u pynman ki ya kani ka lehkmen snem thymme wei ki waheh chnong ym toh u lai ki cha kiwi tawon kiwa khut ya ki neidaw wa ka Tourism Officer da dep khut chwa ko ya ka Synjuk.
Discussion about this post