15 49.0138 8.38624 1 0 4000 1 https://wyrta.com 300 0

Pyndam ka MSSASA ya ki 5 ngut kiwa ksoh kaam wa ya ki ar ngut kiwa e buit yong ka

0 Comments

Jowai: Ka Meghalaya SSA School Association (MSSASA) seiñbei da pyndam kreh ko ya ki san ngut ki dkhot yong ka kamjooh yei man ki kam ki dkhot ka seiñ wei da pyndam leh ya i Post Adviser. 

Ha ka kyrwoh khubor wa da phah da u Tlanwosly Jahrin, Publicity Secretary ka MSSASA seiñbei da pyntip u wa ya katai ka rai da chim da kiwa kitkaam wa ki Executive Members yong waroh ki District wa ki Block Unit yong ka MSSASA na waroh kawi ka jylla ha ka General Executive Meeting yong ka Meghalaya SSA School Association seiñbei kawa pynman ha ka 8 tarik uni u bnai hapoh Khasi National Dorbar Hall Mawkhar Shillong.

Kitai ki san ngut ki dkhot kiwa da chah pyndam kaam toh u Vice President u S. Lyngdoh uwa man leh u Secretary ka MSSASA Mawlai Block Unit, u Finance Secretary u A. Kharbangar uwa man leh u General Secretary ka MSSASA East Khasi Hills District Unit , u E. Khongjee CEC member uwa man leh u President ka MSSASA East Khasi Hills District Unit, u B. Dohtdong GEC member uwa man leh u President ka MSSASA Mawlai Block Unit wa u D. Kharbuli CEC Member.

Ha katai ka yalang hadien wa da yatai sani bha, da iwi i sur waroh ki dkhot da chim ki leh ya ka rai wow pyndam noh ya u H.M. Marbaniang wa u N. Marsiangbai kam ki Adviser yong ka seiñ wei wow pyndooh pyndam noh yaka Post Adviser. I pyndam wei beh ya ki dkhot toh hajrong ka yurim wa lai lait ya ki kyndon wa ka Constitution yong ka Association wei kamjooh leh yei rai yong ka Central Executive Committee kawa man haka 18 Naikhynde uni u snem.

Ka yalang ha katai ka sngi da jied ki leh ya u J. J. Lyngkhoi wow chimti kam u Vice President wa thymme wa ya u Manbhabok Kharraswai wow chimti kam u Finance Secretary wa thymme yong ka MSSASA seiñbei. Da jied leh ya soo ngut ki dkhot yong ka synjuk kiwa kynthup ya arngut ki Vice President ka seiñbei u Francis Wanniang wa u J. J. Lyngkhoi, deilang wa u Shrenlinus Khriam wa u John Elvis Khongsngi wow pait chipor ya ka Unit yong ka synjuk hapoh East Khasi Hills District Unit katwa ym pu dep wow pynman yaka jied thymme ya kiwa kitkaam yong ka Unit. Da rai leh wa ka synjuk u em ko da u Legal Adviser wei da jied ya u Daniel Stone Lyngdoh Nonglait uwa yasaaid aiñ yong ka Supreme Court ka Ri India wow man kam u Legal Adviser yong ka synjuk. 

Kamjooh leh ka synjuk lyngba kani ka kyrwoh khubor da pyntip ko cha waroh kiwa sikai SSA kiwa em hapoh ka lama yong ka Meghalaya SSA School Association (MSSASA) wa nadooh ynne ka sngi kitai ki dkhot waroh kiwa da chah pyndam ym em bynta de ki iyi iyi leh wa ki kaam yong ka Synjuk, pynkut ka kyrwoh na u Tlanwosly Jahrin, Publicity Secretary MSSASA seiñbei.

0 Comments

Leave a Reply