Shillong: Ka Central Executive Committee yong ka People’s Democratic Front (PDF) da rai ko wow pyndooh noh ya ka chuki Chairman ha ka party kawa da jooh ksoh da u CEM warim ka KHADC uwa man leh u MDC na Mawsynram Constituency, u Pynshngain N Syiem uwa da mih noh na ka PDF ha ka 23 Kmaichonglad 2018.
Hawa yaklam wa kiwa pathai khubor ynne ka sngi u President ka PDF, u Ivanlumlang Marbaniang da pyntip u wa ka CEC da rai ko wow pyndam noh ya kani ka chuki (Chairman) neibhah wym em ko katkam ka riti synchaar (Constitution) ka Party, wei ka Party da rai ko wow chna noh da ka District Committee nadooh uni u bnai khnang wow pynkhlan chooh chooh ya ka Party.
U Marbaniang da pyntip u leh wa da thung ya u MLA ka Sohra, u Gavin Mylliem kam u Convener ka East Khasi Hills, ha Ri-Bhoi da thung ya u Dipshon Ryntathiang wa ya u Peter Thongni, ha South West Khasi Hills da thung ya u Ivanlumlang Marbaniang wa ya u Hadrian Lyngdoh uwa man u MDC ka Mawkyrwat wa neibynta ka Shillong City da thung ya u MDC ka Mawkhar-Pynthorumkhrah, u James Ban Basaiawmoit wa u Emlang Lytan.
Chooh chooh ka Party da thung ko leh ya ar ngut ki Vice-president wa kynthup ya u James Ban Basaiawmoit wa u Jason Mawlong, MLA ka Umsning. Katwa ya ki ar ngut ki montri wa em ha ka sorkar jylla, kitæ u Banteidor Lyngdoh wa u Hamletson Dohling da thung ya ki kam ki Working President ka party.
“Ini i bhah kaam chooh chooh ha ka Party man i chibynta wow pynkhlan yei rukom krehkaam ka Party, khamtam wow pynkhreh neibynta ka Election MDC ka wow man ha uni u snem. Thmu i leh wow pynyakhun na waroh ki Constituency wa kynthup ha ka KHADC wa JHADC,” da ong u Marbaniang.
Discussion about this post