Ka yalang kawa da khut da ka sorkar jylla kawa da pynman ynne ka sngi hapyrdi ka sorkar, ki dkhot ka North East Petroleum Mazdoor Union, ki Company pynmih phñiang wa ki tre Petrol Pump da man ko kawa mih soh heiwa da rai wym sangeh pynpoi yei phñiang kari cha Meghalaya.
Ini waroh da sdang i hadien i kynreh yong ki pulit ha ki 7 tylli ki thaw wa da suba wa em i sai tooh yei phñiang napoh ki kari kit phñiang ha ki bynta u sarok NH-6, heiwa neiliang yong ka Northeast Petroleum Mazdoor Union da phah ko da ka chithi cha u Montri ka chnat Food & Civil Supplies deiwa maham wow dam noh u wan booh phñiang chapoh ka jylla Meghalaya deiwa pynbaad wa chah thombor kiwa yah kari yong ki kamjooh kiwa yarap ha kti ki pulit.
Hawa klam hadien ka yalang kawa da pynman ha Nongpoh, Ri-Bhoi District, u Commissioner Secretary ka chnat Civil Supplies ka jylla, u Pravin Bakshi da ong u wa ka yalang man ko kawa mihsoh heiwa da yoh u yaklam ya chiboon ki phang katam iwa emkaam, khamtam wym em iwon iwon i pynthut ha i lai i wan yong ki kari kit phñiang cha Meghalaya neibynta i suk ki paidbah.
Heiyatoh won wa i chah pynbaad wa chah leh embor kiwa yah kari wa kiwa yarap ya ki, da ong u wa i takit yong ki pulit ka Crime Branch dang lai i chakhmat yow chem yei sakhiat.
Neiliang uwi na kiwa yahkhmat yong ka Mazdoor Union da ong u wa hadien kani ka yalang kawa da man ynne ka sngi, daw lai yow klam myntu waka seiñ yong ki ha Guwahati wei da pyntikna u wa ka khut pynman yakhih yong ka Union kawa da thmu wow sdang nadooh myntu ka sngi ym em de ko wei da ong u leh wa ki paidbah ka Meghalaya ymtoh u tieñ ki neibhah ki kari kit phñiang kiwa da dep pyndap man ki kiwa da khreh yow poi cha ki thaw wa toh u pynpoi ha Meghalaya.
Discussion about this post