Ka Voice of the People Party (VPP) da mynjur ko wow yaklam wa u Montri Rangbah, u Conrad K Sangma kamjooh ki heh sorkar ka jylla hajrong i chah pyndam kreh ki 3 ngut ki Investigating Officer ka Lokayukta, hajrong ini neiliang ka seiñ da rai ko wow sangeh chipor yei yakhih hadooh wa da yoh yei pynche deiwa yaklam wa u Conrad.
Ynne ka sngi, ka VPP da mih biang ko cha sarok sa chisien hapoh i yahkhmat u President yong ka, u Ardent M Basaiawmoit yow dawa thung kreh biang ya 3 ngut ki Investigating Officer ka Lokayukta kiwa da chah pyndooh kreh ha u Kmaichonglad (Dec), 2023.
Tangwa ka yakhih ynne ym em da pteiñ ko hadien wa ka Montri wa pait ya ki Kaam Aiñ, ka Ampareen Lyngdoh da khut yaklam ko ya u Ardent wa kiwa yahkhmat ka VPP.
Hawa klam cha ki paidbah hadien i yachem waka Montri, u Ardent da ong u wa i tyrwa ka sorkar lyngba ka Montri ka chnat Aiñ toh wa u Montri Rangbah kwah u wow yachem yow yaklam wa kiwa yahkhmat ka VPP heiwa daw emlang leh wa u Chief Secretary wei ini pynyoo ko wa em i bakla yei pyndam kreh ya ki Officer ka Lokayukta.
Da pynche u leh yei daw wa ka seiñ da mih ko wow yakhih hawa em i pynthut yaka Lokayukta, neibhah kani toh ka bor kawa da booh yow takit yaki kaam baam tooh wei wow pynchitom ya kiwa embynta lang neibhah ka VPP toh kawa yakhun yei baam tooh.
Discussion about this post